الـكــلـيـــة

يااااه على الكلية .. لسا كل حاجة زي ما هي ولسا الأماكن بتفكرني بكل حاجة كنت بفكر فيها وقت ما كنت بقف فيها، هنا كنت بقول كلها سنة وتعدي وأروح مع أمير الحربية، وهنا كانت أول مرة شفت فيها هجام لما جالنا الكلية، وهنا كانت شلة الباربي جيرلز بيقعدوا يضحكوا علينا ((:، وهنا كنت بقعد منعزل لوحدي اتأمل في الناس زي ما أنا قاعد دلوقت . . الوشوش اتغيرت وإن كان مش قوي .. بس اتغيرت .. واللي كانت كاريزمتهم بتلفت النظر من على بعد أمتار راحوا، وجا بدلهم ناس جداد ليهم كاريزما جديدة مسيرها تروح أول ما يصدقوا الدنيا ويرجعوا يقعوا، واللي كان جمالها لافت ولأنها عارفة دا زادت ثقتها فزاد جمالها وزاد معجبيها (لأ منيش منهم يا روح أمك) راحت، وجا بدلها واحدة جديدة ومعجبين جداد، واللي كانوا ماليين الدنيا بضحكتهم وقفشاتهم وتريقتهم على اللي رايح واللي جاي (قال من قريب وشي عامل حادثة قال) واللي رايحة واللي جاية، راحم ...
اللي كانوا في أولى بقوا في رابعة شفت منهم كذا واحد عمرو حسوبة وأحمد بدوي وركة .. حسسوني بجو الكلية تاني شوية، فضلت محاضرتنا اللي بدأت الساعة 4 اليوم دا مع دكتور أنور لحد الساعة 6 وافتكرت وقتها وأحنا خارجين من محاضرة د.صبري والدنيا ليلت علينا، اللي كانت أول (وأخر) محاضر نتأخر فيها للوقت دا، شكل الكلية كان وقتها عجيب، عجيب لدرجة أن أيامها شفتها كذا مرة في الحلم في الوقت المتأخر دا وكأنها بتقلي متخليش شمس الكلية وبهرجتها والهيصة اللي فيها والضحك اللي ماليها يغروك . . مسير شمسها تغرب.

كان اليوم دا برضه عجيب . . جدول دبلومة الترجمة مكانش لسا اتظبط فاضطر دكتور أنور يدي لتمهيدي الماجستير الأول لما دخلت علشان اسأله قالي أنتوا الساعة أربعة بس لو عايز تيجي تقعد تعالى اتفضل، وبالفعل قعدت.. قلت بشرة خير (: ، مكانش اللي قاعدين 15 واحد على بعض وكانت للمفارقة محاضرة مفيدة جداً أكتر من محاضرتي الأساسية . . مفيش نص ساعة عدت ولقيت "عمتو" داخلة D: كنت هضحك في وسط المحاضرة من كتر المفاجأة وإن كان للأسف ملحقناش نتكلم كتير بعد ما سلمنا على بعض لأن محاضرتي كانت بعدها على طول . . بس فعلاً الكلية دي غريبة أوي زي المنتدى دلوقت . . والغريب أكتر أن مكانش فيه أطلال أبكي عليها . . جايز لأني مرتبطتش بقصة حب جواها، أو جايز لأن أحلى أصدقاء طلعت بيهم من الكلية دي لسا زي ما هما ولسا بنتقابل، وإن كان منهم اللي سافر ومنهم اللي الدنيا خدته، لكن لسا زي ما هما .. أو جايز لأني عودت نفسي أني مرتبطتش بحاجة في الدنيا زيادة عن اللزوم، دا اللي أكتشفته فعلاً لما رحت وجيت من الغردقة، هناك كان فيه حياة كاملة وناس وقصص ومشاكل وزعل وضحك وضغط ومكان زي الجنة، بس لأني فصلت نفسي من أول يوم عن الارتباط بالمكان وبالناس محنتش زيادة عن اللزوم .. ودا نفس الشعور بالنسبة للكلية .. كنت من أول يوم معتبر نفسي فيها زائر؛ سنة وأروح كلية تانية، لكن ربنا مأردش وله الحمد على ما أراد. مرت عليا في الكلية دي سنين ووشوش كتيرة وقصص أكتر لكن برضه فضلت نظرتي ليها زي نظرتي للدنيا، مرحلة وتنتهي مفيش حاجة بتفضل ولا فيه حاجة كاملة ولا فيه حاجة تستحق الخناق ولا الحسد ولا العتاب ولا البكاء على الأطلال .. كل خوفي إن السنتين دول يحصلي فيهم اللي محصليش في السنين اللي فاتوا والدنيا تغريني زي ما غرت غيري وأرجع أبكي على الأطلال! . . يالها من كلية، وياله من منتدى وياللأطلال

عمر كتب:: []

لدرجة أن أيامها شفتها كذا مرة في الحلم في الوقت المتأخر دا وكأنها بتقلي متخليش شمس الكلية وبهرجتها والهيصة اللي فيها والضحك اللي ماليها يغروك . . مسير شمسها تغرب.

فعلا مسير شمسها يغرب

. . جايز لأني مرتبطتش بقصة حب جواها، أو جايز لأن أحلى أصدقاء طلعت بيهم من الكلية دي لسا زي ما هما ولسا بنتقابل، وإن كان منهم اللي سافر ومنهم اللي الدنيا خدته، لكن لسا زي ما هما .. أو جايز لأني عودت نفسي أني مرتبطتش بحاجة في الدنيا زيادة عن اللزوم،

معاك حق برده جايز

.. كنت من أول يوم معتبر نفسي فيها زائر؛ سنة وأروح كلية تانية، لكن ربنا مأردش وله الحمد على ما أراد.

مرت عليا في الكلية دي سنين ووشوش كتيرة وقصص أكتر لكن برضه فضلت نظرتي ليها زي نظرتي للدنيا، مرحلة وتنتهي مفيش حاجة بتفضل ولا فيه حاجة كاملة ولا فيه حاجة تستحق الخناق ولا الحسد ولا العتاب ولا البكاء على الأطلال ..

كل خوفي إن السنتين دول يحصلي فيهم اللي محصليش في السنين اللي فاتوا والدنيا تغريني زي ما غرت غيري وأرجع أبكي على الأطلال! . . يالها من كلية، وياله من منتدى وياللأطلال

اوعــــــــى يا صحابى اوعى تتغير خليك كده

[/v/VsZReSJ5AU8[/flash]

من زمان قوى مش رديت على اى حاجه فى المنتدى هنا لاسباب كتير قوى
بس موضوعك ده فكرنى بكل حاجه فاتت خلال الكليه وبعدها لحد دلوقتى
هو مش فكرنى قوى لانى مش نسيت بس يكفى ان حتى لما قدمت لسنه التربوى
فى كليه غير الكليه ومحافظه غير المحافظه بشوفكم كمان فيها
حتى الى بتعرف عليهم بتعرف عليهم عشان شبهكم بشوفكم فيهم والله ياعمر معايا زميل شبهك
حتى معاه تليفون اى فون هههههههههههه اه والله بجد
كل يوم اروح التربوى ده افتكر فرحنا وحزننا وادعيلكم واقول ياااااه ايام
الحمدلله على كل شىء والله الحمدلله ... الحمدلله اننا لسه اصحاب
ويكفى ان دى بقت اكتر حاجه لسه بصدقها وبثق فيها
اان فى حاجه فى الدنيا اسمها صداقه

انا بقالى سنة واكتر مشاركتش بس الصراحة يا عمر موضوعك لازم الواحد يرد فيه بس انا فعلا اتفاجات لما شوفتك والله ربنا يوفقك بالخير كله ياااااااااااااااااااا رب .بس المحاضرة دى جابتلى كمية احباط من التمهيدى مكنش فيه تركيز اساسا بس الحمد لله الثقة كانت فى مشوار وجاتلى تانى ههههههههههههههه . لا بس السنة دى شكلها فلة شمعة منورة جداااااااااااااااااا وزى ما بتقول الكلية مشفنهاش بليل كده الا ايام دكتور صبرى ودكتور كان تانى كده مش فاكره اسمه . بس فعلا الكلية معتش فيه اى روح خالص. لما كنا فى الكلية كنت بحب اصحى الصبح بدرى علشان اروح اشوف اصحابى بوشوشهم الجميلة فعلا المكان مش هو اللى بيربط الناس ببعض حاسة انى بدخلها لاول مرة .يلا الحمد لله على كل شئ وربنا يوفقنا جميعا يا عمر باذن الله يااااااااااااااااااااااا رب

الف شكر يا عمر بجد شكرااااااااااااااااااااااا

بسم الله الرحمن الرحيم ..

الاسم : هوللو :)

السن : شيبوبه

العنوان : كلية اداب دمياط - منتدى شباب بجد

و انا بقرأ كلامك يا عمر حسيت بمشاهد كتيره ف نفس الوقت .. منها مثلا على سبيل المثال و ليس الحصر .. ..كانز تفاح عليها كمية تراب ..مخلياني اكسل افتحها من كتر التراب اللي غطاها .. مشهد كمان .. جو هادي ساكت زياده عن لزومه لدرجة تخليك تبكي و مش عايز تبكي ..في شيء مانعك من جواك انك تبكي ..انك تحسه .. !

الكليه دي عمرها ما كانت ذكرى .. دي حقيقه جوه كل واحد فينا .. واقع بنعيشه و الا ماكنتش كتبت عنها بالجمال ده يا عم دهب انت .. و مع ذلك .. ردي مش هيبقى الوقتي ( اومال ايه كل الرغي ده ..يادي الكسوف ) .. احم احم احم ... لسه شويه .......

اقتباس :

الوشوش اتغيرت وإن كان مش قوي .. بس اتغيرت .. واللي كانت كاريزمتهم بتلفت النظر من على بعد أمتار راحوا، وجا بدلهم ناس جداد ليهم كاريزما جديدة مسيرها تروح أول ما يصدقوا الدنيا ويرجعوا يقعوا، واللي كان جمالها لافت ولأنها عارفة دا زادت ثقتها فزاد جمالها وزاد معجبيها راحت

وحبيت ست الحتة وراحت ست الحتة

ست الحتاااااااااااااا

stop كتب:

اقتباس :

الوشوش اتغيرت وإن كان مش قوي .. بس اتغيرت .. واللي كانت كاريزمتهم بتلفت النظر من على بعد أمتار راحوا، وجا بدلهم ناس جداد ليهم كاريزما جديدة مسيرها تروح أول ما يصدقوا الدنيا ويرجعوا يقعوا، واللي كان جمالها لافت ولأنها عارفة دا زادت ثقتها فزاد جمالها وزاد معجبيها راحت

وحبيت ست الحتة وراحت ست الحتة

ست الحتاااااااااااااا

تسلم ايدك ياعمر :)

أشكركم جميعاً على التفاعل . . زملائي الأشباح

عمر كتب:: أشكركم جميعاً على التفاعل . . زملائي الأشباح

هممممم