بسم الله الرحمن الرحيم
- انا جاي ياعمي بطلب ايد بنتك
- وانت معاك ايه على كده
- انا معايا ربنا يا عم الحاج
- ايوه يعني خريج ايه
- انا بكالريوس تجارة
- بتشتغل ايه ؟
- بشتغل موظف عادي
- طيب امكانياتك ايه
- انا على اد حالي
- طيب وهتتجوز ازاي
- يعني على اد الحال كده وربنا بيفرجها والبركة فيك برضه ياعمي
- لا طبعا متنفعش
- طيب ياعمي انت متعرفش ان الرسول " صلى الله عليه وسلم " بيقول :
" اذا جاءكم من ترضون دينه فزوجوه "
- صلى الله عليه وسلم مقلناش حاجة
بس هتأكل البنت ايه صلاة وصوم وزكاة
طبعا محدش فاهم حاجة من الحوار اللي فوق ده
بس ده حوار انا تخيلته
واكيد بيحصل كتير
مع فرق ان مفيش فيه اخر جملتين
وده اللي خلاني اطرح الموضوع
رسولنا الكريم بيقول كده
والظاهر ناس كتير نسيت الجزء ده
وبقى كل الاهتمام في الجواز " في اغلب الاحوال "
العريس ابن مين وخريج ايه ومعاه كام وهايجيب للبت شبكة بكام
والشقة كام اوضة وهيفرشها ازاي والحوارات دي
مفيش حد فكر مرة لو جاله شاب كويس عارف ربنا كويس
بس ظروفه متسمحش بكل ده
" مش هقول برضه انه مش لاقي اي حاجة "
لا في مقدوره حاجات تعمل جوازة كريمة
يعني يقدر يجهز بيت بس بحاجات بسيطة
ممكن حد يلاقي ده ويقول في الاخر
" اذا جاءكم من ترضون دينه فزوجوه "
اعتقد بقى صعب الايام دي واللي جاية كمان للاسف
طيب نشوف اخر جملتين في الحوار اللي فوق المفروض يبقوا ازاي
- يابني لا يكلف الله نفسا الا وسعها
- يعني حضرتك موافق بامكانياتي البسيطة يا عمي
- ما انت لسه قايل الحديث بنفسك توكل على الله المهم تبقى البنت سعيدة ومبسوطة
طبعا انا بحلم بالحوار ده
السبت 21 أغسطس 2010 - 23:31