""وبحب اشوف كدبك أوي""
راح تكتبِ ايه؟!!
كفاياك بقى
ماهو كلّ حرف بْتكتبه/مابصدّقوش
كدّاب أوي/زيّك كده
إنتَ وْ حروفك كدّابين
فاكر زمانِ الْـكلمتين
”لمـّا كتَبت الصّبر طيّب ع الجبين
والحلم شادد خطوته
ملهوف عشان يوصل لِنا
والفرحة بتبوس الإيدين
علشان نِدَخّلها الحياة
والحب طعمه لذيذ أوي
بيْشَبَّع القلب الجعان؟؟!!!"
في الوقت نفسه كنت سامعة
صوت الألم جوّه انهيار
كلّ المعاني فْ عمرنا
بِيْزيد وبِيْشعللها نار
والصّبر عندك مات خلاص
والحبّ ضايع مِ الأساس
والحلم زعلان منّنا
والفرحة غرقانة فْ وجَع
وبلدنا مش لاقيينها دار
حبِّة مرار/متجمّعين
ومْجمّعين أرواحنا فيها بالرضا
فاكر كمان........
النقطتين الحيرانين فوق السطور
لا هي عارفة تطلع عَ الحروف
ولا لاقية مأوى يْلمّها/لمـّا اتخنَق
صوت الحقيقة فْ قلبها؟!!
طب تفتكر؟!!/لمـّا كتبت على الورق
"اتْكعْبلِت كلّ الوشوش تحت رايات الأمل
واتعلّقت أحلامنا فوق
على شمّاعاتِ الانتظار"؟!!
في الوقت نفسه كنت عارفة
اليأس واخد من ملامحَك
مساحات كتير
وانّك متعرفش الأمل
ولا حتى ليك الإختيار تحلم بإيه؟!!
راح تكتبِ ايه؟!!
فاهماك أوي
رغم انّي حد
شايفك بِجَد/كدّاب كبير
بس انت منّي قَرِيب أوي
وبحبّ اشوف كدبك أوي
الثلاثاء 1 سبتمبر 2009 - 3:20
