البنت لغز.. اللي يحله.. يستاهله

كل حكاية حب

بين ولد وبنت

زهر

علي عجلة روليت..

المكسب فيه

خسارة مؤجلة

والمهزلة..

إن خسارتك ساعات

معناها إنك كسبت..




2

«عايز أبوسك»

قلتهالك بعنيَّا

«إنت مستني عزومة»؟!

قلتيهالي بعنيكي

«يعني أبوس»؟!

قلتهالك بعنيا

«Go on»

قلتيهالي بعنيكي..

وهكذا..

الأسلاك لَمِّسِت

والحكاية ابتدت

وانقطع إرسال العيون

وابتدأ إرسال من نوع آخر..

إرسال مجنون..

3

الحب

زي رسمة ذبذبات القلب

لو ماشيه زجزاج

يبقي القلب سليم..

وإن فجأة بقت خط مستقيم

ماشي في ثبات

يبقي القلب..

للأسف مات..

4

مساء الفل

علي كل

حبيبين مسافرين

علي سفينة نوح

سفرية رَبَّاني..

كده برضه..

تسيبوني ع الأرض

لوحدي..

مستني أعتر

في حبيبتي..

مستني..

طوفان تاني..

5

قلبي العبيط..

الحمد لله

لسَّاه عبيط..

مع إنه عارف

إنه مش حيسكر

حتي لو يشرب محيط..

عَمَّال يكربع

في إزازة الدراما

ويمزْ بالحواديت..

قلبي العبيط..

فِلِّينة واقعة

في إزازة نبيت

6

ورق وقلم

وقهوة وشاي

وسجاير ومزيكا

ووحدة وعزلة..

يالاَّ..

لِمّْ يا قلبي حاجاتك..

في شنطة ذكرياتك..

حنكمل الرحلة..

7

كل ما افتكر

حكاياتي اللي فاتت

أسرح

وأبتسم

وأتعجب..

وما أفوقش غير

علي فوران القهوة

أكُبَّها..

وأحط سكر تاني

وبن تاني

ومن تاني

أقَلِّب..

8

شتا وشارع وبنت

إيدها في جيب الجاكيت

ماشية حزينة وكمشانة

وعيونها في الأسفلت

فجأة..

ظهرنا قصاد بعض

إتثبتنا دقيقتين.. بعدين

سِبنا نفسينا لبعض

وف عز ما هي في حضني

لقيتني..

باصص للسما وانا بانزف

وباصَرَّخ..

«مش فاهم»

رد عليَّا

صدي صوتي

«وحتعمل إيه يا عبيط

يعني لو فهمت» ؟!

شتا وشارع وبنت..



خالد كساب