كتاب القراءة:بمنتهي البراءة نور تسأل وعلي سلامة يجيب.

كتاب القراءة
للشاعر:علي سلامة

شاعر قدر يوصل لقلوب الملايين بكلامه البسيط والمعبر ممكن تكون قابلته مرة في ساقية الصاوي وممكن تكون قرأتله مرة في الدستور او لمحته علي قناة دريم ولو مكنتش واحد من التلاتة دول يبقي مطولش عليك واحكم عليه بنفسك.

بمنتهي البراءة
سألتني بنتي نور
في أربع خمس أمور
مش في كتاب القراءة
قالتلي
بابا يا بابا
مش انتا يا بابا
بتكتب أغاني
وبتقول أشعار
طب أنا سمعت الشيخ يا بابا
بيقول إنك يا بابا
هتروح النار
زي الناس الوحشين
الحراميين الكفار
قوللي يا بابا
يعني ايه استعمار؟
ويعني ايه نيل؟
ويعني ايه هرم؟
ومين اللي حط
النسر فوق العلم؟
قوللي يا بابا.........
يعني ايه استفتاء
ويعني ايه انتخاب؟
ويعني ايه حر؟
ويعني ايه نصاب؟
ويعني ايه كداب؟
ويعني ايه هجاص؟
ويعني ايه اختلاس؟
ويعني ايه خصخصة؟
يعني ايه يا بابا
دستور
ويعني ايه معارضة؟
ويعني ايه مظاهرة؟
طب وليه النهارده
خدنا
اجازة من المدرسة؟
يا بابا
قوللي يا بابا
يعني ايه قهر؟
واين يقع خط الفقر؟
ويعني ايه حظ؟
ويعني ايه زهر؟
يعني ايه يا بابا......
انسان؟
ويعني ايه.. حرية؟
ويعني ايه.. سرطان؟
يا بابا...... يعني ايه
خربوها يا بابا؟
ومين دول اللي خربوها؟!!!!
وكنت فين لما خربوها يا بابا؟
ومين سمارة اللي بتقول عليها دي يابابا؟
وازاي ضاعت من قلبك سمارة؟!
يا بابا انتا معايا!
في ناس بتقول
....كفاية
وعساكر ماسكين
.... عصايه
وبنات متعورين
وتانين ..... بيضحكوا يا بابا
هما دول اسرائيلين
يا بابا؟!
ويعني ايه
ويعني ايه
قولتلها
نور........
ممكن أسألك سؤال؟
قالتلي اتفضل يا بابا
قولتلها
هيا قناة سبيس تون
رقم كام؟!!!!!!!!
وخدتها
عشان تنام.

ملحوظة: الشاعر ده بالذات انك تقرأ اشعاره حاجة وانك تسمعها بصوته شخصيا حاجة تانية خالص جرب ومش هتندم
اتفضل اللينك



https://www.youtube.com/watch?v=rAlbNWdvXx4&feature=related