السلام عليكم
الفهلوه المصريه تجسدت هذه الايام في جاوب واكسب
نري كثيرا في كل وسائل الاعلام سواء التلفزيون او الجرايد والاذاعه بل وصلت الي رسائل علي الموبايل مسابقات جاوب واكسب
اكسب عربيه واكسب 50 الف جنيه واكسب رحله حج وعمره... الخ
وكلها فهلوه
العمليه لما زادت اوي كده قلت اسال علي الموضوع ده
اتصلت بشركه وهي احدي عشرات بل وربما مئات من الشركات التي تعمل في هذه المسابقات
اتصلت وردت عليا صوت حنين كده
مساء الخير ( انجي ) مع حضرتك يافندم ( فاكر اسمها)
قلتلها سلام عليكم كنت عايز اسال ازاي اجيب رقم مختصر للمحمول ورقم ارضي زي 0900 لزوم الشغل عندي ( طبعا كانت تأليف مني )
ردت عليا شغل حضرتك ايه بالضبط
قلتلها مسابقه بين عملاء الشركه ولسه مكملتش كلامي..... راحت مقاطعه كلامي وتقولي مادام مسابقه يبقي لازم تيجي عندنا الشركه وتقعد مع خدمه العملاء علشان تطرح علينا ازي هتعمل دعايه لرقمك
سالتها طيب اخد فكره
قالتلي دقيقه المحمول والارضي ب 1.5 علي المتصل لحضرتك نسبه 0.30 قرش والباقي خاص بالشركه ؟؟
قفلت معاها علي طول بعد ماعرفت شغل النصب ده
يعيني علي الفهلوه والنصب
فلوس من الهواء
بغض النظر عن الـ 0.30 قرش نصيبك بس واللي هيدخل جيب الشركه الا اني حسبتها حسبه بسيطه كده
قلت لو عملت مسابقه زي المفتش كرومبو ولا مسابقات القنوات ولا اكسب عربيه ولا شقه ولا كام الف جنيه ولا اي كلام وارسلت الرقم ده لاصحابي علي الموبايل وعلي الايميلات وعلي المنتديات واي جرونال تعبان وخاصه الجرايد الاقليميه اللي الاعلان فيها بيكون ب 20 جنيه لقيت العمليه كلها مش هتكلفني اكتر من 100 جنيه
لقيت هيدخل جيبي كام الف جنيه من الهوا وطبعا هتستلم العربيه ولا الشقه مع نهايه المسابقه اللي اساسا مبدأتش
وانا اقول في نفسي ليه الارقام بتزيد يوم بعد يوم والمسابقات بتزيد كل ساعه؟؟
دلوقتي بس عرفت الاجابه
وانتوا كمان عرفتوها ؟؟؟
آآآه نسيت اقولكم سؤال المسابقه بتاعتي
في أي عام كانت حرب السادس من أكتوبر عام 1973 ؟؟؟
اذا عرفت الاجابه اتصل علي 0900900900 علشان تكسب عربيه فورية ( اول ماتشوف حلمه ودنك )
تحياتي للجميع
السبت 2 مايو 2009 - 23:46
