كلاكيت للمرة الألف ...أهل فلسطين ..أهل غزة , أيه الحل؟

أكثر من 225 قتيل وأكثر من 400 جريح (cnn , الجزيرة), هل الخبر بقى عادي بالنسبة لنا هل بقينا مبنتأثرش بالعشرات اللي بيقتلوا من أخونا في فلسطين , في غزة , هل كلمة أخونا دي بنعنيها حقاً , ولا بقت دباجة بتتقال وخلاص , هل اللي بيحصل دا عدل , لما يطلع المتحدث الرسمي بأسم وزارة الدفاع الأسرائيلية ويقول إن الغارة دي بسبب صواريخ حماس , فلما قالتله المذيعة إن الصواريخ دي مقتلتش غير واحد فقط فقط إسرائيلي , وأنها بسبب الحصار المفجع على أهل غزة , قالها يبقى خلي حماس تبطلها طالما ملهاش لازمة , يعني في مقابل شخص واحد تحصد عشرات الأرواح , فين العدل لما يطلع تصريح من واشنطن تطالب فيه إسرائيل فقط بإستهداف عناصر حماس من الغارة , مش إيقافها ! أنا لو فضلت أحط علامات تعجب الصفحة هتخلص ..في ظل الظلم الدولي والصمت والخذلان العربي أيه دورك أنت ؟ أيه الحل ؟ الحل في أنك تتفوق في دراستك مش إنك تعتمد على ورق وملخصات وفي النهاية نكتشف بعد التخرج إن لغتك الإنجليزية ضعيفة وأنت قسم إنجليزي , أو إن معلوماتك التاريخية متواضعة وأنت قسم تاريخ , أو إنك بتتريق على الشعر وأنت في قسم لغة عربية ..إلخ , الحل في أنك تقوم تصلي الفجر جماعة هذه الصلاة السحرية اللي قال عنها أحد القادة الإسرائيليين "يقدر المسلمين يغلبونا لو عدد المصلين في صلاة الفجر عندهم بقى زي صلاة الجمعة " أظبط منبهك , وخد بأيد واحد صاحبك معاك يرن عليك لما تكسل وترن عليه لما يكسل , الحل إنك في شغلك في الصيف يبقى هدفك إنك تعمل مصلحتك الخاصة بالفلوس اللي بتحوشها لأنك بقيت راجل ولازم تعتمد على نفسك , مش يبقى هدفك كل يوم خميس تصرف فلوسك في ارع النيل أو شارع بورسعيد أو على أي قهوة , أتعلم حرفتك أو مهنتك أكثر وأكثر وأفهمها بالنية دي , الحل في أنك تلعب رياضة أياً كانت نوعها , جري , سباحة , كمال أجسام , رياضة قتالية , كرة قدم , سلة , طايرة , أي رياضة ويكون هدفك يارب الوقت والطاقة اللي بقضيهم في الرياضة دي الغرض كان فاتي بقضيهم في شرب سجاير (اللي بقت زي اللبان في الجيل ده) أو في شرب حشيش ( اللي بقى بيتفاخر بيه سفهاء هذا الجيل وأصبح كالسجائر) أو في معصية , وغرضي يا رب أن المؤمن القوي خير وأحب إلى الله من المؤمن الضعيف , الحل إنك تأخد دورات (كورسات) في كل شيء تقع عليه أيدك لغة ,كمبيوتر , تنمية بشرية ..إلخ الحل إنك تقول كلمة الحق صريحة متخفش غير من ربنا سواء في أي منتدى هنا أو غيره أو أي حوار بشجاعة أدبية , أو حوار تلفزيوني لما يبقى 15 واحد علماني مسكين شخصية بتحمل نفس فكرك تتصل وتقول رأيك وتدافع عن وجهة نظرك , هي دي الحلول العملية يا أخوانا مش الدموع والصراخ والعويل اللي هيجيبوا نتيجة , هو دا الحل ومفيش حل غير كدا ساعة لما تعمل كدا وتأخد بأيد أصحابك لنفس الطريق وربنا يشوف الأمة كلها ببتحرك وبتعمل حاجة ساعتها بس ربنا هيحطك في المكان الصح علشان يكون ليك دور في القضية دي , ساعتها بس هنستحق النصر , وأنا واثق أنه هيكون بأدينا إحنا بأيد الجيل بتاعنا دا , الجيل دا أتمهدله كثير وضحى ناس كثير علشان يطلع بالشكل دا , علشان الصحوة الإسلامية اللي فيه دي متبردش ...مين يحط أيده في أديدي ويقول هبدأ إن شاء الله من اليوم ..مين هيطير زي النسر بكل حرية ويكسر عبودية نفسه , ويتعامل كالأسد لأنه جدوده كانوا أسود ؟ مين؟