عشان تحافظي علي جمالك وانوثتك في شهر العسل ياعسل......تعالي يا دلوعة ديدي عايزاكي

بسم الله الرحمن الرحيم

حبايب قلبي وحشتووووووووووووووووني جدا
وعارفة بقي لي فترة منزلتش موضوع جديد
بس انتو عارفين دلوعتكم بقي تغطس تغطس وتطلع بموضوع جديد لانج

المهم

طبعا انا عارفة عرايس كتير حلوين بيفكروا ازاي يحافظوا علي جمالهم
في احلي فترة في الدنيا كلها

((((((((((شهر العسل))))))))))))

وربنا يجعل ايامنا كلها عسل في عسل

طبعا الفترة دي مهمة جدا جدا واكيد ليها اهتمام خاص لان مينفعش فيها
اي خرابيط ووصفات ودعك وفرك وروايح غريبة ههههههههههههههه
وفي نفس الوقت طبعا لازم العروسة الحلوة تفضل ملكة واحلي ملكة كمان في الوقت ده

طيب تعالوا معايا بقي نعرف ازاي نحقق ده

شعرك:

اكيد كل عروسة سالت نفسها ملييون مرة اعمل ايه في شعري واكيد مع الغسيل الكتير
هايجهد جدا ايه الحل؟؟؟؟؟؟؟؟؟؟؟؟؟؟
طبعا لا مفر من انه هايتغسل يوميا ويمكن اكتر من مرة كمان في اليوم الواحد
فالحل عبارة عن:
-قبل الجواز تحاولي انك تهتمي بيه كويس اوي عشان يبقي قوي ويستحمل

-الشامبو تغسلي بيه بس مرتين في الاسبوع
وبقية المرات مرة بمية بس سريعا ،ومرة بحمام كريم نضيف اي ماركة ترتاحي معاها
ومرة ببلسم بس علي الاطراف عشان مينشفش

-تجيبي نوع كريم تسريح كويس عشان يغذي شعرك بردو مع كترة الغسيل وطبعا من احلي الكريمات
باراشوت ممتاااااااااااز وكمان دابر املا الجديد وكريم دابر فاتيكا مش بطال كويس بردو
واسمع عن كازانوفا كويس وطبعا لو سيروم زي زيرو فريز يبقي احلي واحلي

-مرة واحدة كل اسبوع هاتي نوع زيت يكون ريحته حلوة بلاش زيوت ليها روايح غريبة
(املا جولد -او بالياسمين ريحتهم كويسة-او 7 زيوت لصانسيلك-زيت باراشوت جولد بردو)
وانتي في الحمام حطي الزيت علي شعرك والبسي بونيه وبعدين اغسلي بقي اسنانك
ورجلك وادعكي جسمك هايكون فات حوالي 10 دقايق اغسلي بقي شعرك عادي بالشامبو
وبكدا بردو انتي بتغذي شعرك وتتطريه وبقدر الامكان تحميه من كترة الغسيل

-المشط الخشب ضروري عشان يقلل التساقط بلاش المشط البلاستيك

ريحة شعرك وشكله:

من اهم الحاجات ياجميلة لازم تكون ريحة شعرك تهوس تهوس مش اي حاجة يعني
وبلاش الروايح الغريبة ولم الشعر والكمكمة دي احنا عايزينك ملكة حلوة ساحرة بانوثة طاغية
-الشامبو هاقولك حاجة غريبة بس في الجون حطي عليه معلقتين جيلي فراولة
واتمتعي بريحة فظيعة جوزك هايتجنن ويعرف الريحة دي منين ومتخافيش ده جيلاتين
يعني ملوش اي تاثير وحش ع الشعر
-بعد كل حمام البخاخ السحري عبارة عن(مية ورد+اي زيت عطري بتحبيه )واخلطيهم
وبعد كل شاور نشفي شعركوبخي عليه من جميه النواحي ومن جوة الشعر
كدا وهاتلاقي الريحة تجنن وهاتبقي عملة زي الوردة الفواحة

استايل شعرك:

طبعا الشعر هايتبل كتير فبلاش السشوار الكتير
عشان متجهديش شعرك اوي واعرفي ان الشعر الليس مش هو بس الشعر الجميل
لا الكيرلي كمان يجنن وهو الموضة وسهل اوي تعمليه دايما ويكون مبلول كمان

-هاتي بانتين بديل الزيت وبعد ماتغسلي شعرك ادهني كمية محترمة منه علي كل الخصل
واتمتعي بااحلي شعر كيرلي جنان
وتقدري بقي تتفنني كمان يعني مرة تسيبيه كله كيرلي

ومرة القصة بس سشوريها خفيف وافلقي شعرك ويبقي من القصة ليس
ومن ورا كيرلي

-مرة سيبيه كيرلي والبسي سورتيت رقيق الشكل بيكون وااااااااااااو

وممكن من غير كيرلي خالص ولميه خالص وحطي التوكة الريش الكبيرة
دي هاتدي شكل لطيف اوي حتي وهو مبلول
(((((طبعا دي افكار وانتي اتفنني بس حبيت اساعدك شوية مش اكتر)))))))

طيب بقي بشرتك:

طبعا ممنوع الماسكات والعريس موجود الكلام ده بينا وبين بعض بس
هو مينفعش يشوفه

واهم نصايحي ليكي ياقمر:

-مش دايما تحطي ميكب تقيل خليكي دايما سيمبل واحلي ستايل
ستايل النو ميكب رقيق اوي

بس الميكب التقيل يكون للسهرة بس

-اوعي تنامي وتسيبي الميكب علي وشك دايما اغسليه قبل النوم

-هاتي نوع غسول للبشرة كويس واستخدميه الصبح وبليل

-هاتي من العطار كمية مية ورد مركزة محترمة وخففيها وحطيها في بخاخ وكل شوية
رشي علي بشرتك عشان تنعشيها وكمان ريحتها لطيفة وبتقفل المسام

-مرة في الاسبوع هاتي اي نوع مقشر وممكن دوف كويس ولطيف ومنك كمان معقول
وياريت لو استيفز اي حاجة وهاتي فرشة اسنان ناعمة(soft)وادخلي الحمام وممكن مع الشاور بتاعك
اغسلي وشك بالغاسول وحطي المقشر وبالفرشة علي خفيف قشري وشك بحركات دائرية
واشطفي ورطبي بشرتك بمرطب خفيف

-عشان تحافظي علي نضارة بشرتك هاتي شريط فيتامينeوشريط فيتامين aمع فازلين
وفي حمام مائي لحد مايختلطوا وحطيهم جنب التسريحة وقبل النوم تحطي طبقة خفيفة جدا
علي بشرتك وكمان تحت عنيكي خفيف خالص

-طبعا تدهني شفايفك كمان والصبح تقشريها بالفرشة بردو وتحطي زبدة كاكاو وردي كدا
واتمتعي بااحلي وانعم شفايف

-شرب المية اوعي تنسيه عشان تحافظي علي جمالك وصحتك

-ياريت تاخدي فيتامين عشان يساعد شعرك وبشرتك وكمان يقويكي في الفترة دي
لان جسمك هاتحصل فيه تغيرات كتير

جسمك:

طبعا بردو ممنوع استخدام خلطات ليها روائح نفاذة نهائي وبرو مش هاينفع تسيبي
العريس لوحده وتقعدي في الحمام عشر ساعات تفركي وادعكي
طيب ازاي تحافظي علي نعومة وجمال جسمك من غير ده كله

-قبل الجواز ياجميل تحضري خلطتنا الصابونية الجميلة
وتعملي كمية محترمة منها تقضيكي فترة وتحطيها في برطمان شيك
وتوديها مع العفش وماتفارقش حمامك
(الخلطة:
صابونة دوف
مية ورد مركزة
بشر مكعب مسك
جليسرين(فنجان قهوة)
زيت زيتون(فنجان قهوة)

ابشري الصابونة وارفعيها ع النار مع مية الورد ولما تدوب اطفي
وضيفي الزيت والجليسرين وعصير ليمونة وبس وصبيها في البرطمان
وطبعا تقدري تعملي مقدارين مرة واحدة(بلاش زيوت يكون ليها روايح نفاذة زي مااتفقنا)
اول ماتدخلي الحمام
ادهني جسمك وبعدين اغسلي اسنانك وافركي كعبك وبعدين هاتي الليفة التمام
وبليها وادعكي جسمك بقي كويس كويس وهاتي ملح الحليب وقشري الركب
والكوع والمؤخرة
اشطفي جسمك وصبي في ايديك زيت بيبي جونسون وحطي عليه
شوية عطر مركز (بدون كحول طبعا)وادهني جسمك وهو لسة مبلول
وبعدين بالبودرة المعطرة رشي جسمك كله والبسي هدومك
ورشي عليها برفانك وحمام الهنا يااحلي عروسة

وممكن كمان ازازة الشاور جل فضيها في حاجة اكبر وحطي عليها
فنجان زيت زيتون وفنجان مية ورد مركزة وخليها علي طول في الحمام
وبلي الليفة وصبي عليها الخلطة وادعكي
ويوم خلطة دوف ويوم خلطة الشاور ومية الورد
واوعي تنسي اهم حاجة الترطيب ولما هاتدهني الزيت بعد الشاور مباشرة
وجسمك مبلول نص نص هايمتص بسرعة جداااااااااااااااااااا
ومش هايزيت خالص وهايرطب جسمك اوي

خلي علي التسريحة اي نوع بدي لوشن تحبيه وابشري عليه
مكعب مسك (اللي عامل زي الشمع ده ريحته تجنن)
وقبل النوم رطبي ايدك ورجلك عشان تفضلي ناعمة زي البيبي
وريحتك تجنن جوزك وصدقيني كدا شهر العسل مش هاينتهي ابدا باذن الله

ازالة الشعر في شهر العسل:

طبعا المفروض انك عاملة سويت محترم قبل الجواز ومش هاتحتاجي
تعملي غير بعد فترة بس بردو تحسبا لاي ظروف
انا مش بنصح بالسويت للاسف لان الفترة دي مش هاتقدري تعملي سويت
هاتكوني مشغولة ومش وقت عك وتلزيق اكيد
ونصيحتي هي الواكس لانه اقرب شئ للسويت وسهل وسريع
وممكن تعمليه بسرعة ومن غير عك
وممكن تعملي ايدك في يوم ورجلك في يوم عشان ماتاخديش وقت في الحمام
وتبقي دايما شمعة منورة
والبديل التاني اكيد براون بس بليز ماتطوليش فيها خليها للزنقات بس

نصايح مهمة جدا للعناية بالمنطقة الحساسة:

انا عارفة طبعا الموضوع ده بيؤرق بنات كتير جدا وعشان كدا
قلت لازم اتكلم فيه
المنطقة دي ارجوكي ارجوكي بلاش عك كتير يعني تبعدي تماما
في الفترة دي عن المعطرات والحاجات اللي ممكن تهيج الجلد
وطبعا ممنوع منعا باتا استخدام الدش المهبلي الا بامر الطبيبة

-اهم حاجة انك تحافظي اوي علي نضافتها بالغسيل الدائم بالمية الدافية
والتنشيف من ادام لورا بفوطة قطن تتغير يوميا

-استخدمي الغاسول الطبي يوميا بس اول اسبوع او 10 ايام وبعد كدا كفاية اوي
مرتين او تلاتة بالكتير في الاسبوع(وطبعا انتو فاهمين فرق كبير اوي بين
الغاسول الطبي والدش المهبلي)

-بعد الجماع بحوالي ربع ساعة او تلت ساعة بالكتير(ودي فترة كافية جدا جدا
عشان حدوث حمل يعني مش لازم تفضلي نايمة اليوم كله علي ضهرك)
لازم لازم تخشي الحمام لان ده شئ مهم اوي انك تفضي المثانة
بعد الموضوع ده عشان تتفادي الالتهابات

-وعشان الترطيب والريحة الحلوة خلي في حمامك ازازة فيها
جليسرين وعليها زيت ورد وادهني منها علي خفيف مع كل تغير للبانتي

-ياريت كل فترة تقعدي في مية دافية بملح منها تطهير وتعقيم للمكان

وبكدا ياست العرايس يارب اكون قدرت اساعدك ولو بسيط بافكار
تحافظ علي جمالك ورونقك في احلي ايام حياتك وبوصفات
خفيفة لطيفة ماتخدش وقت كتير

ولازم تعرفي يا قمراية ان العروسة ربنا بينزل عليها
جمال ورونق وبهاء بيخليها بدر منور مهما ان كان
واوعي تفضلي تقولي ركبي مش عارف ايه
وشعري بتاع ايه لا لا لا لا
ثقي في نفسك وفي انوثتك والبسي وادلعي واوعي اي شئ يمنعك عن ده

العناية بالفم:

لازم طبعا تغسلي اسنانك مرتين في اليوم
ومش اكتر وبلاش بعد اي حاجة فيها احماض
تغسلي اسنانك عشان ده بيساعد علي تاكل المينا
وبعد غسيل اسنانك اتمضمضي كويس بمضمضة مطهرة للفم
مليين الصيدليات بنكهات مختلفة ومش غاليين خالص
وياريت بقي في علبة شيك كدا تحطي قرنفل مطحون
وبطرف الفرشة حطي قرنفل وادعكي علي خفيف
وريحة نفسك هاتبقي روعة
وفي درج التسريحة لازم تخلي لبان بالنعناع
وهولز عشان الزنقات وانتي فاهمة بقي

وسلام بقي يااحلي عرايس
بحبكوا اووووووووووووووووووي

» كيف تحافظي علي سر جمالك
» كيف تكوني دلوعة بسبعة ايام (للبنات فقط )
» الأظافر والعناية بها , كل ما تهتمي بالتفاصيل كل ما جمالك يزيد أكثر .
» جمالك من السنة النبوية
» حافظي علي جمال عينيك فهي سر جمالك