مره قالتلى نفسي (شعر عامى)

قالتلى نفسي مالك كده مش عجبك حالك

شويه فرحان وشويه متضايق قولى بس مالك

قلتلها يعنى مش عارفه مالى

ورايا هموم وحجات كتير شغلالى بالى

احزن ساعات وافرح ساعات وساعات الاقى الهم جالى

وساعات كتير فى عز الحزن يتقالى نكته ينقلب حالى

ضحكت عليا وقالتلى يعنى هو ده اللى مزعلك

ما انت من زمان وده حالك

كل شويه تقولى خلاص هينصلح بالك

يعدي يوم ويعدي التانى وحالك عمره مبيحلالك

بس انت عارف المره ديه شكلها كده مش طبيعيه

قلتلها بينى وبينك هى شكلها سنه مش معديه

مخنوق كده وحاسس ان الدنيا مش رومنسيه

مش عارف الاقيها من الدراسه ولا من الاكاديميه

ولا من البيت ولا من طنط زكيه

ولا بعد ما اتخرج هعمل ايه فى حياتى ديه

قالتلى بس روق كده بس دي الحياه ميه ميه

كل مشاكلك ليها حلول بس مستخبيه

قلتلها قولى ما انا عارف حلولك اللى هيا

قالتلى إن كان على الدراسه ذاكر شويه يا اخى بعد الكليه

وإن كان على الخنقه روح اتفسح شويه

عمرك زورت العنانيه؟؟

والبيت سيبك منه واحلق لطنط زكيه

اما بعد ما تتخرج عارف عم عطيه

قلتلها وده ماله ومال اللى فيا

قالتلى مهو خريج نفس الكليه

بس ربنا كرمه وفتح محل فول وطعميه

ضحكت وقلتلها هى دي بقى الحلول المستخبيه

الله يرحمك يا ستى صفيه

ديما تقولى متكلمش لا غبى ولا غبيه