جميعنا يعشق قراءه التاريخ " وخصوصا التاريخ المصرى "
فالتاريخ المصرى زاخر بالاحداث وعلامات الاستفهام؟؟؟
عندما نبدأ بسم الله ونفتح كتاب التاريخ المصرى
نجد فى الصفحه الاولى العم مينا الشهير بنارمر مؤسس الاسره الفرعونيه الاولى
وموحد القطرين القطر الجنوبى والشمالى
ولكن لم يذكر لنا التاريخ الاسباب الحقيقيه لقيام الحرب بين الشمال والجنوب والذى ادى
لتوحيد البلاد
وبما ان التاريخ بيعيد نفسه اطلقت لتفكيرى العنان للوصول الى اسباب
اول حرب فى التاريخ المصرى حرب توحيد القطرين
الفكره الاولى
دخل نارمر على زوجته الحاجه ام حورس ووجدها تبكى بكاء مريرا
وسألها عن سبب بكائها وهى زوجه اول فرعون فى تاريخ الاسرات
فقالت له : احنا فى اغسطس ياحبه عينى والدنيا نار نار
نفسى يكون لينا مصيف نصيف فيه انت فرعون على الصعيد
يعنى بنصيف فى الترع والنيل مافيش بحر عندنا
نفسى اصيف على البحر وانقع جسمى فى اليود والميه المالحه
واقعد على الرمال الساخنه اتمتع بحرارتها وفى يدى الفريسكا الاسكندرانى الحلوه
عرفت سبب بكائى ياحبه عينى
فقال لها نارمر : بسيطه حاكم الشمال صديق حميم وبيننا علاقات تجاريه ومصالح
مشتركه إنشاء الله تعالى ياام العيال اجيب لك احلى شاليه فى مارينا وتعيشى حياتك
ويذكر التاريخ ان ملك الشمال رفض تخصيص قطعه ارض لمينا فى مارينا
حيث ان مارينا تخصص لمحاسيب الملك واولاد الناس
وصعب ان نخصص فيها لصعايده وان كان ولابد ممكن نخصص لك فى جمصه( كلمه
مأثوره لملك الشمال)
مينا : افتحى الباب ياقمر
-ابدا مش هفتح غير لما تجيب لى شاليه فى مارينا
_بقولك افتحى لأكسر الباب
_ ههههههه هتعملى نفسك مندور بيه ابو الدهب ..بدل ماتكسر الباب روح اكسر دماغ
ملك الشمال وهاتلى شاليه فى مارينا
وقامت الحرب الاولى فى التاريخ المصرى واستطاع مينا ضم الشمال الى الجنوب
بسبب مارينا والمصايف والفريسكا
ولكن رغم ذلك مازالت مارينا للطبقه الشماليه فقط طبقه الاثرياء والمحاسيب واولاد
الناس اللى همه اما باقى الشعب الجنوبى والفقرى مازالوا يصيفوا فى جمصه
وميامى وشارع خالد بن الوليد ومرسى مطروح
=====================================
الفكره الثانيه
معروف ان الفراعنه هم اول من عرفوا كره القدم ووجدوا ذلك منحوت على الجدران
الفرعونيه القديمه وكان هناك منافسه شديده بين القطر الجنوبى ويمثله فريق زمـــالك
والفريق الشمالى ويمثله فريق الاهــلى
وكان الفريق الشمالى الاهــلى يحصد جميع البطولات كأس امون ودورى ازوريس
وكان فريق زمــالك يأتى دوما فى المركز الثانى وكان زمالك يشتكى من الحكام
المحليين وكان يستقدم حكام اجانب من البلاد الفينيقيه وسبأ وحمير
وفى يوم كان نهائى كأس امون بين الفريقين ويقام فى ستاد الكليه الحربيه
واستطاع اللاعب ابو تريكه احراز هدف رائع اعتبره الفريق الاخر انه تسلل
وان رافع الرايه كان مسطول وبيستهبل ونسى يرفع الرايه وهاجت جماهير الفريق
الابيض الجنوبى ودخلت فى صراع مع جمهور الاحمر الشمالى
وانتهت الحرب بأنتصار الفريق الجنوبى بقياده مينا رئيس رابطه نادى زمالك
ورغم توحيد القطرين ومرور اكثر من خمسه الالاف سنه
مازال الفريق الاحمر هو الذى يحصد جميع البطوالات ويافرحه امسلو وشادو
والفريق الابيض راضى بالمركز الثانى
الثلاثاء 20 أبريل 2010 - 8:47
