لو ربنا فك عقدتك .. واتخطبتي .. فإليك نصائحي حتى تأخذي بخطيبك من مركب الخطوبة إلِّي محدش عارف ها ترسى على إيه .. إلى مثوااااه الأخير في قفص النسانيس..( قصدي قفص الزوجية السعيد)..
أجمل ما في الخطوبة العزومات الرومانسية .. على أحلى محلات أكل فى البلد.. واللي عمرك ماهتشويفها بعد الجواز .. المهم نصائحي لك عند أي عزومة مع خطيبك..
1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولازم البوز زي الخنجر ولا من فوق طبعًااا
2- العيش أوعي تفضحينا وتقطعيه بسنانك .. ولا الرغيف نصين بأيدك وكل نص لقمة وتحشري .. أوعي .. العيش بيتقطع بالسكينة فى الطبق .. وبعدين تاخدي لقمة .. لقمة .. بالعافية .. قال يعني نفسك مسدودة .. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه ...
3- الشوووربة .. أبوس كعب رجلك .. بند الشوربه ده مهم جدًاااا .. الشوربة تتشرب من غير صوت خالص .. ومن غير ماتقعدي تنفخي فيها .. زي القهوجي اللي بينفخ فى الحجر للزبون .. وطبعــاً عايزك تنسى تمامًا .. السلطانية اللي بتقيميها على بؤك ف البيت .. وتدلوقي على روحك .. بالمعلقه وبدون صوت .. سخنة ولعة برضه بدون صوت .. وتملى تلت الطبق بس شربه .. مش تميليه .. عشان تلهطيها لآخر نقطة.....
4- الرز طبعاً .. بيتاكل بالشوكه .. أوعي إيدك تتمد ع المعلقة .. وتغرفي من طبق الرز وتعبي .. إوعي .. الرز بالشوكة .. وكأنك بتبوسيه مش بتاكليه ..
5- المكرونةالاسباكتي .. برضه بالشوكة .. تتلف على طرف الشوكة .. لحد ما تخلص وبعدين تحطيها فى بؤك من سكات .. مش تشفطي المكرونة عود عود ..
6- السمك مشكلة .. شوفي بتفصلي اللحم عن الشوك .. إزاي ..؟؟ تقطعي اللحم من النص .. بالطول وبعدين تفردي اللحم ع الجانبين ولما تخلصي ناحية .. متقلبيش السمكة بلاش فلح .. شيلي السلسلة بالشوكة والسكينة وحطيها ف جنب الطبق وكملي أكل النص التاني .. وبدل الفيلم الهندي ده .. نصيحة .. ماتكليش السمك خالص ..
قولي مابحبش السمك وخلصي نفسك ..
7- الجمبري .. إذا كنتي عارفاه .. أول ماطبق الجمبري ينزل .. بصيله بقرف واحتقار شديدين .. آل يعني زهقانة من كتر أكل الجمبري الجامبو ف بيت بابـا .. وأتنهدي جامد وقولي .. بردوه ..؟؟؟ وتروحي قاطعة راس الجمبرييايةبالشوكة .. أنا فى عرضك إنسي المصمصة دلوقتى ..
8- البطاطس سواء مسلوقة أو محمرة .. أوعي تهرسيها وتدبيها على الرز وتدي ... لا ... لآ... لآ ... بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي ..
9- الفاكهة .. لو الفاكهة فيها بذر .. طلعيه من بؤك بالراحة وحطيه فى إيدك وهي مقفولة .. وبعدين فى طفاية السجاير اللي على الترابيزه .. أوعي ياحبيبتي من نظام التفتفة للبذر .. إنسي ....
10- ولما تخلصي أكل تحطي إيدك على بطنك .. قال عصافيرها بتصوصو من العينات اللي كلتيها .. وتقوليله مش ممكن .. أنا عمري ما اتفجعت كدة (اقصد اكلت كده) .. أنا أودامي أسبوع .. هابطل أكل فيه .....
وبعدين تمسكي الفوطة اللي دايمًا موجودة على التربيزة من غير لازمة .. وتبوسيها .. قال يعني بتمسحي بؤك .. وبعدين تستأذني منه لدخول التوليت لإصلاح ماكياجك .. دا اذا كنتى بتحطى مكياج .. وتخشي التواليت وتطلعي من شنطة إيديك .. لفة الفول والطعمية والبصل اللي جايباها معاكي ..
وبالهنا والشفـــا
الجمعة 16 يوليو 2010 - 9:39
...مبحبش إلا اللي على طبيعتهم 
(لأ مش أوي كدا زي الوش اللي فات دا يعني 
