باصى يا كابتن.... باصى !!!

ما حضراتكم شايفين الكورة مع أحمد.. أحمد معاه الكورة.. ماشي أحمد بالكورة.. عدى أحمد من الأول والتاني والتالت.. خلاص كفاية كده يا أبوحميد باصي لزمايلك بقى.. طبعا حضراتكم سامعين زملاءه وهم بيندهوا عليه "باصي ياكابتن باصي!".. وأحمد ولا هو هنا.. ماشي أحمد بالكورة.. قرب ع الجول.. هيشوط.. ممكن يجيب جول.. آه.. برافو عليك يا سيد.. مدافع صلب بصحيح.. انتهز إن أحمد تعب من المشوار الكبير اللي عمله.. وخطف من قدامه الكورة قبل ما يشوطها.. وضاع المجهود.. مش كنت باصيت الكورة لزمايلك يا أحمد؟!" .8.



تفتكر شفت المشهد اللي فات ده كام مرة؟!:1:

وكام مرة كنت "أحمد" اللي مفكر نفسه بيلعب المباراة لوحده وبس.. مع إن فيه عشرة تانيين بيلعبوا معاه في نفس الفريق؟

وكام مرة كنت مطنش زمايلك وهم بيندهوا عليك "باصي يا كابتن.. باصي!".. وعملت نفسك مش واخد بالك.. لأنك متخيل إنك لو باصيت الكورة لحد تاني وجاب هو الجول هو اللي هياخد كل الأضواء.. وإنت مهما عملت مش هتاخد ضوء زيه؟

كام مرة جالك شعور وإنت بتلعب كورة ولا بتعمل مشروع مشترك مع زمايلك في الجامعة ولا وانت بتشتغل مع مجموعة كبيرة في شغل ما.. بأنكم تفتقدون أهم حاجة.. بتفقدوا أهم سبب من أسباب نجاح أي مجموعة بتشتغل مع بعضها..

روح الفريق.. :o9:


معظمنا معندوهوش الثقافة دي..
ثقافة الكل في واحد..
وده مش مبدأ اشتراكي شيوعي لو جه في بال حد منكم..
مطلقا..
ده مبدأ إنساني بحت..
مبدأ زرعه فينا الله سبحانه وتعالى لما خلانا مانقدرش نمشي بشكل متزن إلا لو كنا بنمشي على "رجلين اتنين" مش رجل واحدة بس..
واللي خلانا نشوف بشكل أفضل لما نبص "بعنينا الاتنين" مش عين واحدة وبس..
واللي خلى أجدادنايلخصوا الكلام ده في مثل بليغ جدا..
"إيد لوحدها ماتصقفش"..:o9:

وفكرة الابتعاد عن الأنانية والذاتية والعمل بروح الفريق سبب رئيسي في تقدم البشر والناس...


وحتى الحيوانات والحشرات يا جدع!



مش مصدقنا؟!
طيب اقعد كده على سلم بيتكم...17.
وتابع مجموعات النمل وهي بتتحرك وبتنقل ذرات السكر اللي وقعت منك وإنت بتحطها في كوباية الشاي..
هتلاقي لو ذرة السكر كبيرة.. حوالي خمس أو ست نملات بيشدوها مع بعض.. عمرك ماهتلاقي نملة عاملة فيها "شجيع السيما" وماسكة ذرة السكر الكبيرة لوحدها وبتجري بيها هي وبس.. لأن النملة.. النملة ياجدع عارفة إن "نملة لوحدها ماتصقفش"!

سيبك من النمل...
وتعال للبشر..
البشر الحقيقيين..

دكتور "أحمد زويل" عالمنا المصري اللي أخد أهم جايزة عالمية في الكيمياء.. دايما بيكون حريص على إنه يؤكد إن الجايزة مش بتاعته وبس.. وإن الكشف اللي وصل له ماوصلوش لوحده.. أبدا.. كان دايما بيؤكد أن وراء الاكتشاف ده فريق عمل كبير جدا.. وأنه لولا الفريق ده متعاون عمرهم ما كانوا وصلوا لكل اللي وصلوا له..

وتخيلوا أن دكتور "زويل" قال مرة إنه كل يوم بيصحى الصبح وهو مبسوط جدا إنه هيروح الشغل عشان يشوف آخر النتائج اللي توصل لها الفريق اللي بيشتغل معاه..

لا فكر بقى في مين اللي هياخد الشهرة.. ولا فكر بقى مين اللي هيجيب جول.. كل اللي فكر فيه إن الفريق هو اللي هيكسب..




مش برضه احنا محتاجين روح الفريق دي عندنا..
محتاجينها في البيت والمدرسة والجامعة والشغل..

قولوا لنا ازاي ممكن نغرس روح الفريق.. وروح الجماعة فينا..
واحكوا لنا عن تجاربكم اللي قمتم بيها مع ناس تانيين ونجحت عشان روح الفريق كانت مزروعة جواكم..
وإيه التجارب اللي فشلت لأن روح الأنانية كانت مسيطرة عليها..