زمــــن البـعرور !!!

ليك في الاغاني البيئة .........؟؟؟؟










(مسمط....ابو الغيط .....الكرع ....البغبغان.......الدهل ...النتن ...الرمة ...الجحش ...
....البغل ........الجربوع .....صفصف ...مدهول علي عينه ...بتنجانة ...!! )


دي لمؤاخذة يا اكسلانس مش شتايم لا سمح الله .....ولا الفاظ وحشة ولا حاجة .....

ولله الحمد يعني.........:

دي اسامي مطربين ....(ده هما اللي بيقولو ..؟)...ومغنيين ..(ده هما بردك اللي بيقولو ...)...

انا بقا ..العبد لله اطلقت عليهم لقب.....مالوش حل ..بجد في الجون ......الا وهو .........

( مكفريييييين الذنووب..)........ايون امال ايه........!!

عمرك ما ركبت ميكروباص ..؟؟

عمرك ما شفت توكتوك ...؟؟

عمرك ما رحت محل عصير ؟....وأنت بتشرب كدا في امان الله ..(ولسة بادء في الكوباية.. يعني حرام كدا ..!).ولاقيت صوت زي بتاع السفينة الحربية ده..

عارفه ..؟؟ اللي تلاقي فيه القبطان بيشد الحبل كدا وتلاقيك اترميت في البحر من الازعاج ...نفس القصة ....صوت غريب الشكل والهيئة ..!!

صوت اقرب تشبيه ليه يعني ...لموأخذة ....صوت واحد معدته بتوجعه... والواحد ده بقي.في مكان ما طبعا كلنا عارفينه...(أه اللي هو التواليت ..!!)

مفيش ميكروباص ركبته في حياتي ...وما اكتر المرات اللي ركبت ..وياريتني ما ركبت..؟.....مفيش مرة الا ويبقي شكلي من الاغاني دي اللي شغالة

اقرب لشكل عجل البحر ..!!.....ويمكن عجل البحر بيبقي اوسم مني ساعتها ...

مفيش مرة رحت محل عصير عشان بدل ما أمص قصباية وابهدل نفسي رحت اشربها في كباية اكرم واحسن واشيك ..!!

الا والاقي واحد من الافاضل اللي قلت علي

اساميهم فوق ..: اذا كان الجعر يعني ولا فسوخة ..ولا الرمة .....ولا أي جربوع.....الا ويطلع عيني .

..ويجبرني ادفع من غير ما أشرب ..وامشي وأنا عندي بله مغولي من كتر الدوشة والازعاج اللي حصلو ........














* ..احنا بتوع الجرجير ..!!



مرت الاغنية الشعبية يا اخوااااني ...بثلاث مراحل ....مرحلة تسمي : (بالمرحلة المحترمة النصف مضروبة بالنار ..!)....وهي فترة السبعينات والثمانينات
ايام المدعو احمد عدوية ..وماتلاه من مطربين أفذاذ أسسو ..وأورو القاعدة العامة للغناء الشعبي ...حيث ظهرت تلك الموجة العارمة الساحقة الخارقة المارقة..:
بتاعة السح اندح امبووووه...إدي الواد لأبوووه.. ودي عملت انقلاب وقتها في ايام الرئيس السادات.. أيون .(.كانت هيا سبب حرب اكتوبر أساسا يبني ..!!)
ثم ظهرت اغنية بجد ..تعتبر نقلة كيفية وكمية ونوعية وتحت محشيه ..في تاريخ الاغاني البيئة ...ألا وهي أغنية..(وللا ستاذ احمد عدوية الفذ بردو):
كركشندي دبح كبشه ...(.!!!!) يا محلا مرقة لحم كبشه...(.!!!)........ نكشو ...عكشو .....ووالله العظيم الكلمات دي بجد واتغنت ونجحت.....!!!!
كركشندي ...؟؟؟؟....نكشو؟؟؟؟؟......!!... .. صباح البتنجان يا بلد ..!!
ثم تلا ذلك فترة التسعينات ..حيث ظهر حبة اسطوات انما اييه....سكر ..سكككرررر.....وهم بالترتيب ..:
الاخت :فاطمة عيد ..(لا تعليق..)
الاخ..الامور...الريس ...متقال ..(وده ليه سيديهات والمصحف ..وعليها صورته بالربابة ولا تعليق غير: صباح البتنجان يا بلد..!!)

الاسطي بأه....الكبير ....الجامد..السكرة..العترة ...
شعبان عبد الرحيم ..وان كان ده اكتر واحد بحترمة لانة مابيهموش الناس وبيغني لقضايا عامة بلغة البسطاء..وهو الحسنة الوحيدة وسط سيئات السادة مكفرين

الذنوب ......




* ..وخلصنا الجرجير ...!!!!



ثم تأتي المرحلة الرااائعة والتي نعيشها الان ..وهي مرحلة تكفير ذنوبنا بجد فعلا ..,,

وهي مرحلة .:(سبنا الجرجير ..وجينا للعنب والخيار ..وكل سوق الخضار ..!!).........وكانت بدايتها بالاخوة الافاضل ..::

1-حجازي متقال ...(ابن الريس متقال واللي خد علي عاتقه مهمة مساعدة الناس علي تكفير ذنوبها ..)

الامور جدا اوي خالص ..:واللي يعني انا شخصيا لو شفته قدامي ..: هاعمل معاه واجب ..!! ....: الاخ....القائد ..والملهم ..وعنتيل الاغنية البيئة :

2-سعد الصغير ................ولا تعليق مني علي الاخ سعد لان هذا الرجل المغوار الفاضل لاينفع معة الاقواااال..امال اييه ؟ الافعال بس هيا اللي تنفع مع هذا الرجل !

3-البوب الرائع ..والشائع ...والمائع ..::::؟؟؟؟ عمااااااااااااااااااد بعرور.....اللللللللللللله .......

مش عارف ليه كل ما اسمع صوت الاخ عماد بفتكر مسابقات الماتادور في اسبانيا ......(اللي هيا بتاعة التيران دي ..!)...ولو حد عرف الاجابة وحياتكو يدلني

عن طريق الاتصال بزيو تسعمية حبة ارقام ..او علي الخط اللاسع ..:2249

حيث غني الاخ ..البعرور..أغنية العنب ...اصفر اخضر احمر ..يطلع في شتا او صيف ..والاخ عما بعرور يشكر الحقيقة علي انة نبهنا ان في لون جديد للعنب

وهو الاصفر ..وكمان انة بيطلع في الشتا..ودي حاجة جميلة الحقيقة معرفش يعملها مهندسي الهندزة الوراثية..!

تتبقي مرحلة ....وانا شايفها اهم مرحلة ...في تاريخ الغناء عامة ..............ونكمل الفيلم ...!!





* ميكروباظ الهنا ..ياريتني ما كنت هنا ..!!




مرحلة من اجمل واعتي المراحل ...:: وبدون مقدمات ولا رغي كتير ..زي ماكان الملك مينا قائد مرحلة النهضة في مصر...

واخناتون قائد مرحلة الايمان والتوحيد ...........

فأن الملك ريكو يا أخواني ادخلنا ...وخرجنا..وبهدلنا ...وكفرنا ...مرحلة جديدة هي مرحلة ..: اي حد يقول اي حاجة وفي اي وقت ..!!

بأمانة شديدة ...ريكو ماخلاش اي عذر لأي حد أنة يتكسف يطلع في التليفزيون ...والسؤال ليه ..؟ والجواب ..: لو انت بتتكسف من التليفزيون

تطلع فيه وتتصور علشان شكلك او مستواك او صوتك او لبسك ...........فأبشر يا أخي الفاضل ...أبشري يا أنستنا الخجولة ....فما معني ان نشاهد

يا أخواني ...

غوريللا مكسيكية...شكلها مبعجر ...لابسة فستان مشجر...وصوتها ممكن لو لمسك يعور ...

علي التليفزيون ..وبتغني ..وفرحانة بنفسها اوي كمان..لااااااااااااا بعيدة اوي دي بأه ..........معلش ..كدا انت مالكش حجة ..

ممكن تطلع في اي وقت ..لابس اي حاجة ...بتقول اي حاجة ..عن اي شئ ...وما حدش هايكلمك .ولا هايدايقك ..بالعكس .دا ممكن يسقفولك ..

هاتقوللي ازاي ..؟.....هاقوللك مالكش دعوة ....العم ريكو...بيضمنك .........!!

وأخيرا ....

لا تعليق غير كلمة الاخ محمد سعد (اللمبي ..)...:

لتوفرولهم الكوللة.........لأما تجيبولهم ساندوشتات حلاوة بالقشطة ..!!


* * *




سؤال المشاهين في المنازل ..:


بتحس بأيه وانت رايح فرح لواحد بتعزه وبتحبه ...وغصبا عنك شغلو أغاني بيئة والرقص اشتغل ..والصوت طالع من الدي جي ..

زي صوت وحوش مسلسل هركليز ....بتبقي حالتك ايه وانت قاعد...؟؟؟؟


( 1-عايز تنتحر...2-عايز تنتحر 3-عايز تنتحر !! ....4-كل ماسبق ؟ )

جميل موضوعك يابروف بجد اشكرك عليه

وفعلا ظاهرة التدني في الذوق العام بقت ظاهرة سائدة جدا

وللأسف سائدة عند المتعلمين المثقفين تمام زي الجهلة

بس مش دي المشكلة..لان كل واحد حر في ذوقه

المشكلة الاكبر هي ان اللي بيسمع الاغاني اللوكال دي مصمم يسمعها لباقي المواطنين

طب ياسيدي الفاضل ياللي بتسمع النوع دا من الفن الهابط او حتي ياللي بتسمع الفن الراقي

من فضلك اسمع لوحدك ..بلاش ازعاج ..بجد الناس خلاص مبقاش عندهم احساس بالغير

كلهم بيتفننو في ازعاج بعضهم بدعوي الحرية والترويح عن النفس

ولو جيت تتكلم يقولولك انتا رجعي وغير مساير للعصر..

علي فكرة انا مش قصدي الاغاني او الموسيقي بس

انا قصدي كمان القرآن والادعية الدينية

اللي الناس بتشغلها بأعلي صوت

انا واحدة من الناس ايام المذاكرة كنت هضيع بسبب جارة لينا طول النهار فاتحة علي القرآن المرتل بصوت عالي

جدا..ولما طلبنا منها توطي صوته ..وافقت بس باستنكار غريب..كان ناقص تقولنا انتو كفرة هتروحو النار

عموما احترام الغير وعدم ايذاء اسماعه بأي شيء هوة خير علاج

والمفروض كل الناس تلتزم بكدا

بشكرك يابروف مرة تانية علي الموضوع بجد رائع

وآسفة للاطالة ..بس فعلا الموضوع شدني لأن بجد بسبب وجودي في راس البر

انا اكتر انسانة بعاني من الموضوع دا(خصوصا اغنية حجرين عالشيشة)الناس مشغلاها ليل نهار

أحلي سلام

آه معلش نسيت اجاوب علي السؤال


انا اصلا مش بروح افراح

مش بحب نمط الافراح السائد في مجتمعاتنا

احنا اقتبسنا كل حاجة من الغرب ..الاموضوع الافراح دا

افراحهم بسيطة ومحترمة وهادية..ياريت نكون زيهم

تسلم الايادى يا لؤى
بصراحه انا بكره كل الاغانى الشعبيه ولو سمعتها بسمعها استهتار باللى وصل ليه ما يسمى الفن ولما بحضر فرح وألاقى فيه رقص فأكيد بنتحر بس خارج القاعه لانى بسيب الفرح سورى يعنى يولع واروح بيتى بإحترامى وتسلم الايادى مرة تانيه موضوعك اكتر من رائع