ل حاجة بنفكر فيها بعد مابنختار شريك \ شريكة الحياة
وبعد مداولات الشبكة والمهر والمقدم وانتو عليكم ايه واحنا علينا ايه
ييجى التفكير فى شكل الفرح
اللى يقولك انا هاعمله فرح عادى يعنى فى فندق او اوتيل او نادى
واللى يقولك لالا عادى ايه انا هاعمله اسلامى بس عادى
يعنى الدى جى هيكون موجود بس اغانى اسلامية وفى اى مكان بقى
واللى يقولك لا طبعا الاختلاط مرفوض فى الاوقات دى عشان الشيطان وكده
فانا هاعمله اسلامى بحت منعا لاى اختلاط
بمعنى السيدات لوحدهم فى قاعة والرجالة لوحدهم فى قاعة
وحد تانى يقول لاء انا هاعمله حاجة كده ع الضيق يادوبك باباها ومامتها واخواتها
واهلى انا كمان وبس ع كده احنا اولى بالفلوس دى
لكن حد فينا فكر يعمل فرحه فى الشارع ؟؟
يعنى شوية خشب يتجمعوا مع بعض ويتسموا مسرح
وتجيب فرقة وممكن كمان راقصة
وتحط كراسى وترابيزات وتقدم اكل وحاجات تانية لا داعى لذكرها
وبيحصل افراح ومنها فرح فى شارع ادامنا كده
الفرح ده بدا حوالى الساعه 9 بليل وخلص الفجر
جت الفرقة حطت الالات بتاعتها
وكل واحد بدا يستعد للقيام بمهنته
طبال و عازف البيانو واللى المفروض انه مغنى اعد بيشرب يانسون
لعله عسى يغنى بصوت كويس
وبعد ما استعد اول واحد فيهم-اللى هو عازف البيانو -عمل ايه ؟؟
شغل مقطوعه موسيقية موجودة ع البيانو لمدة ساعة
المشكلة انها تخلص وهو يعيدها تانى وتالت ورابع
لحد ما الواحد حفظها وصدع منها
ياريتها جت ع كده بس
بعد شوية بدا الطبل والهيصة و سمعنا اوحش صوت يا عم الحج
اصلا متسمعش منه ولا كلمة غير انه بيندمج مع الموسيقى واى كلام بقى يتقال
( متركزش بقى المهم ان فى هيصة )
وشوية وبدا كل واحد من المعازيم يطلع يجامل ابو العروسة ( الظاهر انه جامل ناس كتير فهما بيردوهاله )
منى .. انا .. حسن جودة.. واخويا محمد جودة.. ومحسن جودة .. وعيلة جودة كلها
اول وتانى ومليون وهيييييييييييييه
واسمع اجدعها دوشة وابقى قابلنى لو عرفت حتى تقعد فى شقتك عدل
ع الرغم من ان مكان الفرح كان بعيد الا انى حسيت انهم اعدين معانا فى الشقة
المهم المجاملات شغالة وفجاة تلاقى اطباق الاكل بتتوزع ع المعازيم
ومعاها اطباق تانية مفهمتش فيها ايه بصراحه
الا لما شوفت ولد واخد طبق منهم واعد ع جنب بيلف اللى فى الطبق فى ورقة بيضا
يالهوى وعلنى كده
طب مفيش بوليس ولا نيابة للكلام ده
اخويا قاللى ماهم واخدين تصريح بالفرح
قولتله اه بالفرح مش بالكلام ده
بعدين بقى جت الهانم الراقصة بلاش نتكلم عن لبسها
نتكلم هى كانت بتعمل ايه قبل تأدية واجبها
الهانم اعده بتشرب سجاير عادى جدا
هتقولولى وفيها ايه ماهى رقاصة وبعدين دلوقتى بقى فى بنات عادية بتشرب السجاير دى بردو
بس تحس كده انها بتشربها ببجاحه ( سورى فى اللفظ )
شوية وجالها كوباية شاى ومعاها الشيشة
ويكأن الفرح معمول عشان خاطرها تقعد تشرب وتعدل مزاجها
وحوالى الساعه اتنين كده العريس والعروسة مشيوا وسابوا الدوشة شغالة
مش المفروض كده اللى بيفرحوا بيهم مشيوا خلاص بقى قفلوا وامشوا
لا ازاى معاكم للصبح
طب ذنبهم ايه الناس اللى وراه شغل الصبح ومشاوير وعاوزة تنام
ياسيدى انت عندك استعداد تتحمل عاقبة وذنب الفرح ده
اتحمل وشيل لكن متتعبش الناس معاك
اللى انا عاوز اسالهولكم :
ممكن حد يعمل فرحه بالشكل ده ؟؟
انا مش معترض عن كونه فى الشارع لاء انا معترض ع الشكل ده تحديدا
وربنا مايوعدكم بفرح من الافراح التى تجيب الصداع دى
ودمتم سالمين
الأحد 25 يوليو 2010 - 23:09
