بصراحة يا جماعة الموضوع ده يضايق اوي ويقلق
مريت في يوم من امام احد المساجد في بلدي في وقت صلاة ولا اعرف ما الذي دفعني للنظر بداخل المسجد لصراحة انا ذهلت وزعلت اوي اني الاقي عدد صغير جدا بمعني الكلمة يتعدوا علي صوابع الايدين بيصلوا قولت يمكن الناس هتيجي كمان شوية لفيت بتاع عشر دقايق ورجعت تاني من اودام الجامع فوجئت ان مفيش حد خالص جواه
يا تري عندي حق في قلقي فين ابهتنا واخواتنا كانوا بيعملوا ايه وقت الصلاة وايه الا شغلهم عن انهم يصلوا في المسجد
طيب فيه ناس هتقول بيتنا بعيد عن المسجد ودي مش حجة طبعا فين الناس الا بيتها بجانب المسجد معقولة هما دول بس مع انه في منطقة مليانة بيوت من جميع الجهات والمسجد كبير جدا
يا تري لو كنت مريت من جانب اي مسجد غير ده لان ما اكتر المساجد في بلدنا كنت هلاقي نفس العدد او ازيد بشوية صغيرين ولا كنت هلاقيه فاضي خالص؟
ليه هجرنا بيوت ربنا ؟ وبنكون فين وقت ما يقول المؤذن حي علي الصلاة ؟
ياتري بتكون نايم ولا علي النت ولا بتلعب كورة ولا بتتفرج علي التليفزيون ولا ايه بالظبط
ايه المانع القوي الا هتبرر بيه غيابك عن نداء ربنا وصلاة الجماعة يوم القيامة ؟!!!!!!!!!!!!!!!!!
الف علامة تعجب واستنكار واستفهام الا بيحصل ده
يا تري شبابنا فعلا وصل بيهم الاستهتار للدرجة دي
انا عارفة ان ناس كتير هتحاول تبرر ده بأي مبرر مش هنقول حاجة كل انسان بيكون عنده ظروفه واعذاره بس مش لدرجة ان بيت ربنا يكون مهجور للدرجة دي ومش كل صلاة فيه عذر ومانع قوي
عارفة برده ان فيه هيقول دي بنت يعني صلاة المسجد مش لزام عليها وصلاتها في بيتها محببة اكتر من الذهاب للمسجد للصلاة بس ده برده مش مبرر بالنسبة لك اخويا العزيز انت مسئول عن قراراتك امام ربك وامام نفسك وامام اخواتك واولادك لان اخوك او ابنك او حتي صاحبك لو شايفك بتصلي في المسجد عمر ما كانت وصلت المساجد لهذا الحد من الهجر
المسجد ايام الرسول الحبيب صلوات الله عليه مكنش زي مساجدنا كده اليومين دول مجرد شوية خشب وخوص نخيل في العرش وحصر علي الارض وكان علي الرغم من كده مفيش واحد مسلم او حتي طفل كان بيترك صلاة واحدة تفوته في المسجد كان يسيب كل حاجة في ايديه اول ما يسمع نداء الرحمن ويسارع لتلبية نداه
اما دلوقتي المساجد غاية في الروعة تكييف ومراوح وسجاجيد غير طريقة البيني نفسها والمواد الداخلة في بناء المسجد ورغم كدة تلاقي الكثيرين جدا بتقاعسوا عن اداة صلاتهم في المسجد
اعتقد بل متأكدة ان يوم الجمعة فقط هو ميعاد زيارة المسجد وكمان فيه ناس بتعمل كدة بحكم التعود وان صلاة الجمعة لازم تتصلي في المسجد وجماعة
ده عن هجر المساجد تخيلوا بقي الناس الا مش بتصلي اصلا لا في بيت ولا في مسجد
بصراحة فيه كلام كتير لازم يتقال في الموضوع ده بس ده لازم يكون تفاعلاكم معايا ومحاولة نصيحة نفسكم وغيركم
ربنا يتولانا برحمته هجر المساجد دليل من دلائل قرب يوم القيامة
يا تري هتعمل ايه بعد ما تقري الكلام ده غير الرد طبعا والمشاركة ؟
يا تري لو مش بتصلي هتصلي ؟
يا تري لو مريت في وقت صلاة من امام مسجد وانت اصلا مش بتصلي هتدخل وتصلي؟
يا تري هتسيب بيوت ربنا ورمز الاسلام مهجورة اكتر من كدة؟
يا تري عارف ان صلاة الجماعة افضل من صلاة الفرد ب27 درجة؟
اللهم اني اعوذ بك من عذاب جهنم ومن عذاب القبر ومن فتنة المحيا والممات ومن فتنة المسيح الدجال
الجمعة 30 يوليو 2010 - 9:19