بصوا بأه ..أولا الحكاية دي من فصيلة هم يبكي و هم يضحك ..
بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة...فبليز بليز .بلاش تريقة
الحكاية دي مش يعرفها أي حد غير انا و ماما ..مش حكيتها لأي حد من أصحابي ..يعني ابقوا اتمنظرو ا قدام كل أصحابكم بالأمتياز ده ...حصريا ..حكاية العريس ..إقرا الحادثة ..اقرا الحادثة
احمم..مقدمة...عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده والهبل الازلى ده .لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..*** عمي عمل كده و البت لسعته حتت قلم على وشة .علم على صداغه 3 أيام ..قام هو اتكيف قوي و قال البت دي واضح انها مؤدبة و متربيةوراح خطبها ..آه وربنا..هي صحيح بعد كده اتضح ان ايديها بتطول عليه في كل المواقف مش في الموقف ده بس .بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش دي في مقام عمتي برضه
المهم أنا يوم نازله من البيت رايحه عند ناس قرايبى ..دي ..حسيت ان فيه عين هتخرم قفايا .اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل .قوام جينا ..هو ..هو" فاكرينهم ؟..المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا مش اعرف أبويا .باللي ف رجلي و لايهمني لا شباب المستقبل و لا جمال مبارك ولا حاجه أبدا..
بس لاقيته في نص المسافه كده ..بيميل عليا و بيقول باسلوب رزين كده
...لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك .بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك .(حضرتك تاني يا حلولي). رديت عليه وقلت .والله الكلام ده مش يتقال في مواصلات و بعدين انامش اعرفك و مش متعوده أكلم حد مش اعرفو
طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك .ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم
في المواضيع دي ..لو سمحت مش تحرجنى اكتر من كده ..جامده جامده يعني ... رد وقالى الحقيقة انتى كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني
الواد بأه التباع راح شاخط فيا في اللحظه دي .الأجرة يا أبله والا هتركبوا ببلاش...ي*** الذين..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مش يصح ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون .هيتقدملي خلاص أيوة كده هو انا صحيح مش اعرف هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.
أول ما المكروباص وقف لقيته نزل معايا في نفس المحطه و بصلي و قاللي .أنا حبيت أنقذك يعني في المكروباص ..واضح قوي انك مش معاكى فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 500 جنيه..قالي باستهزاء كده .لااااامش اصدق ..الدم كان خلاص قرب يطلع من نافوخي زي النافورة..رحت مطلعه كل اللي في الشنطه مورياهولي .أهه حتى شوف 50-100-200-220
لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه
و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوباااااا .فص ملح و داب
أختكوا بأه واقفه في وسط الشارع هابلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟
بعد شوية كده لفيت و دخلت شقه قرايبى ..... و على وشي تعبير كده زي تعبير المجانين ..دخلت البيت ..قعدت ع كرسى السفره ..و فجأه .....انفجرت في العياط ..و العيال قرايبى اتلموا حواليا..مالك .فيه ايه؟...حد زعلك ..حد كلمك؟
من بين العياط و الشحتفه مش قدرت أقولهم غير كلمه واحده
.................................................
..................................
..................
اتسرقت
السؤال هنا للبنات تفتكري ممكن تعملي ايه لو لقيتي عريس في الشارع
وبيقول انه عاوز يتقدملك هاتتصرفي ازاى ؟
عايزة اعرف رأيكم
وكمان رأي الولاد ياترى ممكن تتقدم لواحدة شفتها في الشارع ؟
هل ممكن دي تكون مقدمة تخليك تحاول تعرف اهلها واخبارها وعيلتها وممكن تتقدملها فعلا؟؟؟
ياترى ممكن تفاتحها اولا والا تروح البيت من بابه احسن؟؟
ها مين هايتناقش معانا؟؟؟
منقول
الجمعة 6 أغسطس 2010 - 8:21