ممكن تكون الاول علي الدفعة الموضوع سهل اوووووي دي الوصفة السحرية اقراها كويس وما تطلع الاول تبقي تدعيلي
اول حاجة : ان تكون مرهف الحس
بمعني انك تبكي كتيييييير بعد كل امتحان وانك تنهار وتترمي علي الارض وانك تضرب الارض بايديك ورجليك ومفيش مشكلة برضة في اغمائه بسيطة ولو اي حد سألك ترد كده وانت مموت نفسك من العياط (اصلي.........ما حليتش كويس وان الامتحان كان زفت ومقرف وانك هتسقط في المادة دي)
بـــــــــــــــس.........لو صاحبك رزل ممكن يقولك لية دا الامتحان سهل اوي ان شاء الله مش هتسقط في المادة دي تعالي نراجع سوا الاجابات تروح قايل ....... لا...لا...لا مش عايز واديها شوية
وخليك متأكد ان المادة دي اول مادة تجيب فيها امتياز
تاني حاجة : الراحة البدنية
بمعنى ان يكون رد اخواتك اذا سأل احد اصحابك عليك بالتليفون معلش دا نايم ويا ســـــــلام لو ممتك اللي ردت علي التليفون لازم تقول (معلش يا حبيببي اصله بعد ما اتفرج علي المسلسل امبارح راح لعب كورة وطلع اتفرج علي الفيلم الاجنبي وجه نام لحد دلوقتي انا مش عارفة الولد ده هيذاكر امتي وطبعا المكالمة ما ينفعش تخلص قبل ما ممتك تشتمك شوية لحد ما تقنع صاحبك انك مش بتذاكر خالص طبعا ساعتها انت هتكون نايم عشان امبارح قعدت تذاكر 23 ساعة وقولت تناملك نص ساعة وتصحي تكمل مذاكرة
تالت حاجة : مبدأ الصداع المزمن
بمعني اخر من الكلية للبيت ومن البيت للكلية (علشان تلحق تذاكر) ولما يقترح عليك احد افراد الشلة الخروج للترفيه تجيلك الحالة وتصرخ بأعلي صوت اه.....اه......اه..... راسي.... مصدع اووووي روحو انتو انا هاجي معاكو المرة الجاية ولو حد عرض عليك بعض اقراص الاسبرين لا تتوتر وقول لهم ان طبيبك الخاص بينصحك بنوع معين من الاقراص
رابع حاجة : الاحساس بالفشل
لازم تتحس اصحابك انك فاشل ومش فالح في حاجة يعني مثلا لو شفت حد قاعد يذاكر رغم انك عارف انك اشطر منه بمراحل وانه مهما ذاكر مش هيوصل لمستواك ابدا مهما عمل لازم تقول الاسطوانة المشروخة دي ....(يخرب بيتك انت علي طول بتذاكر كدة يا بني انت بتحسسني بالفشل حرام عليك )
وخلي بالك........ لازم تركز في تمثيلك وانت بتقول الكلمتين دول وهيبصلك نظرة بريئه ويقول.......... والله ورايا حاجات كتييييير ومش لاحق اخلصها وانت عارف ان كلامه صحيح لكن ولا يهمك وروح قوله( هو انا مش عارفك دا انت موس مذاكرة وانا فاهم كل حاجة انت بتقول كدة بس علشان ما نحسدكش
وبعد ما تقول الكلمتين دول امشي وانت مطمئن انه مش هيذاكر تاني لانك بكلامك حطمت معنوياته .
__________________
الثلاثاء 14 سبتمبر 2010 - 3:49
