طوابير يا مصر طوابير- خمس ساعات فى الجحيم

طوابير يا مصر طوابيرهههههههههههه

هحكيلكم يا اولاد قصه الشاطر البارون والشاطر عمر يوم ما اتهفوا فى نافوخهم وقرروا يطلعوا الفيش الفورى

وها ها ها يا فورى

تبدا الرحله من اتفاقنا انا وعمر بالذهاب الى سجل استخراج الصحف الجنائيه ( الفيش )

وقلنا لازم نطلعه فورى

وها ها ها ها يا فورى

اتفقنا على ان مفيش نوم وفضلنا صاحيين من اليوم اللى قبله على اساسا نروح بدرى


وفضلت صاحى وقلت او هكذا خيل الى عقلى المريض انى بما انى هاروح ابدرى اذن هاخلص بدرى
ولكن هيهات اكتشفت يا جماعه ان الامور مش بتمشي كده خالص

خرجت من البيت حوالى 6.45 وقابلت عمر فى دمياط حوالى 7.15 وبصراحه الراجل مواعيده مظبوطه

وصلنا هناك 7.30 ويا ريتنا ما وصلنا لقينا هناك طابور من 15 واحد هو قالى ايه دا كله ايه دا كله

بالاضافه الى ( مش مبسوط منك )

قلتله اهو نقعد ونشوف

طبعا الموظف المختص ما وصلش غير 8


وقلنا اكيد هنخلص الحمد لله وابتدا الطابور يزيد بقدره قادر والبابا اتقفل وقال هيدخل كل 10 مع بعض واقفوا طابور

وقفنا طابور و ها ها ها ها يا نظام

ويبدا العذاب ووقفنا لمده 5 ساعات تقريبا على اقل تقدير المشكله مش فى الوقت لكن

الموظف قفل المكتب وراح قال ايه يصطبح ( يفطر ويشرب الشاى وسيجاره على الماشي) ومش مهم احنا نولع ب......

وتبان هوايات الشعب المصرى فى الطوابير فلان عمل وفلان سوا والغريب انهم كلهم بيدعوا على ناس احنا كلنا عارفينهم

واكتفيت بالضحك وباقول لعمر مش مهم نتكلم والا هيستضيفونا ( مديريه الامن)فوق يحتفلوا بينا .... ناس طيبين اوى



ويبان عبقريه الشعب المصرى فى واحد يقعد يصرخ باعلى صوته وهو فى اخر الطابور ويلعن الكوسه والواسطه والمحسوبيه وفجاه اهلا عم محمد ونكتشف ان عم محمد ده جوز خالته ويفتح الباب ويدخل الرجل مع عم محمد

بالاضافه لوجود بعض من الجنس اللطيف اللى طبعا احنا بندخلهم عشان ما ينفعش يقفوا فى طوابير

وكمان بعض المسجلين والمجرمين اللى محطوط ف ايدهم الاساور الذهبيه وقلنا يا بختهم

وبكده يا اولاد بعضا من هذا وذاك بدل ما كان الطابور قدامنا فيه 15 واحد بقي حوالى 50

وتحول الباب المغلق الى واحه الامل فى نفسنا امتى الباب يتفتح وندخل تقولش هندخل الجنه

بس بجد خلصنا الطابور بعد عمل صداقات مع اللى كانوا حوالينا عشره طابور بقي


واكتشفت يا عينى ان ال15 واحد اللى كانوا قبلنا كانوا بايتين من اليوم اللى قبله واللى يشوف مصيبه غيره تهون عليه بلوته

ويقولك تقدم وحراك سياسي ييجوا يشوفوا

النظام وها ها ها يا نظام

بتتقدم وفيه حرالك سياسي ......استاااااااااااااااااااذ

Hollo كتب:

ها هاهاها يا مصر

stop كتب:

كنت أنت وعمر أعملوا نفسكم مساجين و أدخلوا بسرعه

وها ها ها ها يا فورى امال لو كنتم بتعملوا فيش عادى كان زمانكم لسه ماروحتوش لدلوقتى

والله عندك حق

وعمر كمان كان صايم

بنت دمياط كتب:

ايه يا جماعة انتو قوام كدا هتهنجوا من أول طابور يقابلكم

لاااااااااااااااااااااااااااا لا لا لا انا حزينة بجد علي حال شباب مصر

اومال هتعملو ايه في باقي حياتكم القادمة دي هتبقي كلها طوابير في طوابير بس مع فارق انكم هتبقوا مجبورين

علي الوقوف والحشرة فيها بفرمان سلطاني من الباب العالي (طبعا انتو عارفين مين الباب العالي )

كمان فيه حاجة لو تلاحظو ان الصورة واضح فيها انكم كنتم واقفين في مكان ضل ومفيش فيه شمس

يعني الموضوع كان معاكم فل الفل وكان ماشي معاكم حلاوة طحينية

بس بجد بجد الله يكون في عونكم اعتقد ان دي اصعب فترة حاليا لأنها اول اصطدام ليكم بالعالم الواقعي

بروتينه الممل وموظفينه المرهقين وعدم نظامه وعدم المساواة فيه بين الافراد

عموما ربنا يوفقكم يارب في حياتكم والقادم ان شاء الله يكون أفضل من الحالي

أحلي سلااااااااااااااااااام

يعنى يا بنوته سبتى كل ده وركزتى ان احنا واقفين فى الظل

بس كنا واقفين وقفه حميميه كل واحد فى جيب اللى ادامه

professional كتب:

اومال لو بتشوف اللى بيحصل عندنا فى المركز علشان فيش
يا خبر
انا كل مرة باشوف طلبة مرمين برة المركز على ما البيه الضابط يخرج
تقعد تطلع برة فى الشمس مدة ساعتين على الضابط ميخرج
وبعد كده الموظف رايح يفطر
ووالله العظيم كان طابور الفيش من الاوضة الى عند البوابة المركز
كم كبير علشان الفيش
قعد ساعتين علشان اخلص فيش
والله اللى انت شفته النهاردة يا بارون بيحصل كتير
وانا يمكن قلت خلصوا الاوراق دى من بدري علشان ميكنش في زحام
بس ليه روحت فى المكان تعملوا الصحيفة الجنائية
مش دى الفيش الجنائي ولا ايه يا بارون

فيش للتجنيد يا لؤى ولان الفرزه بتاعتنا خلاص قربت فما ينفعش نستنى 15 يوم لما نعمله فيش عادى




شكرا على ردودكم


وربنا ما يبتليكم بطابور ابدا يا رب