بسم الله الرحمن الرحيم
ابدا حكايتي من وانا صغير في ابتدائي كده ولما كان ابويا ياخدني معاه الجامع في كل الفروض وكنت الحمد لله متميز في دراستي ومحافظ علي صلواتي
افتكر في احد الاعياد كان العصر بياذن وكنت انا واخويا واختي بنتفرج علي التليفزيون وابويا داخل بيقول انتم اعدين والعصر بياذن ... يوميها قاللي انا واخويا اليوم فيه 5 صلوات يعني هاتضربم كل واحد 5 ضربات ... ويوم كنت ما صليتش العشا وابويا راجع من الشغل قلت اكيد هايسالني علي الصلاة وطبعا ماكنتش اعرف اكدب فقلت اعمل نايم بس مادخلتش عليه وقومني وسالني اذا صليت ولا لا وطبعا كانت الاجابه هي لا , شالني من بطني ورفعني فوق وسابني وقعت علي الارض وعينك ماتشوف الا الضرب ... طبعا ابويا بيعلمني درس ان عذاب الاخره ادهي وامر
المهم اني الحمد لله فضلت محافظ علي كل صلواتي لحد ايام ثانوي لما بعدت شويه شويه عن الصلاة لحد مابقيت مابصليش الا بعض الجمع
وفي امتحانات ثانوي تعبت اوي في الامتحانات وشيلت الفيزياء ومجموعي انضرب وكان 71.2% مجموع مايدخلش الحمام طبعا
جوز اختي اتريق عليا قوي وقاللي طب انت بس تلحق تجاره ومكنتش اعرف ان فيه كليه اصلا اسمها تجاره لاني كنت عيني علي (طب - هندسه - لغات وترجمه الماني - صحافه واعلام)
دعيت ربنا اني ادخل كلية تجاره انتساب حتي وان يكون معايا فيها واحد صاحبي اسمه احمد محمد
المفاجاه ان احمد ده كان مجموعه 407 يعني 63% وسبحان الله تجاره انتساب تاخد من 407 اللي هو بالظبط مجموع صاحبي ده
ومش كده وبس ده كمان كانت ارقام جلوسنا في الامتحانات 3131 وده مجموعي 3132 وده مجموعه
ياااااااااااااااااااه دا انا كنت بعيد جدا عن ربنا ومش باصلي وربنا اتقبل دعوتي مش مصدق نفسي
حاولت ارجع تاني وانتظم في الصلاه واحده واحده وبقيت اصلي فرض وافوت فروض
لحد فجحر يوم 31/1/2010 يوم لما عرفت حبيبتي وانا بقدرة قادر انتظمت في الصلاة ومن يوميها والحمد لله مافوتش ولا فرض وبقيت ادعي كتير ربنا يارب اجعلها ليا نصيب ياااااااارب
طبعا افترقنا ولعب الشيطان عليا اللعبه الخطيره من كام يوم
دا انت لما كنت بعيد عن ربنا استجاب دعواتك ولما قربت منه ماستجابش ليك
مش عارف ليه الكلام ده شاغل فكري والوسواس اللعين مش سايبني في حالي (فاللهم اني اعوذ بك من همزات الشياطين واعوذ بك رب ان يحضرون)
عشان كده انا قررت اني اعمل الموضوع ده لكي اَنصح فيه واُنصح
اخوتي في الله (حافظوا علي الصلاة والصلاة الوسطي وقوموا لله قانتين)
(ان الصلاة كانت علي المؤمنين كتابا موقوتا) (ان الذين امنوا وعملوا الصالحات واقاموا الصلاة واتوا الزكاة) (ان الذين امنوا وعملوا الصالحات كانت لهم جنات الفردوس نزلا . خالدين فيها لا يبغون عنها حولا )
(اول ما يحاسب المرء عليه في قبره الصلاة وهي اول ما يحاسب عليه يوم القيامه) ( الصلاة عماد الدين من اقامها اقام الدين ومن هدمها هدم الدين)
احبتي في الله حافظوا علي صلاتكم تنعموا بجنة ربكم ولا تدعوا للشيطان مجالا في حياتكم
ارجوا من الله الا اكون بهذا كمن قال فيهم نبيه "لعن الله علماء بني اسرائيل , كانوا يقولون ما لا يفعلون"
وقال لهم "اتامرون الناس بالبر وتنسون انفسكم وانتم تتلون الكتاب افلا تعقلون"
الإثنين 27 سبتمبر 2010 - 14:20
