الحلوه دى قامت تفطر ملقتش رغيف
والديك ينوح كوكوكو باردون يا نظيف
وحكومه عايقة وذكية ومية الميةوقعدة طريةتحت التكييف!!!
صبح الصباح فتاح يا عليم
والبيت مافيهشى ولا مليم
لا صحة نافعة ولا تعليم
فى الزمن الزيف!!!
يا مصر يا انا ف عرضك
حرست طولك مع عرضك
والعصبة دى سرقت ارضك
الطف يا لطيف!!
يا مصر يا مه الله يسامحك
ملامحى معادتشى ملامحك
النيل حداكى وفين قمحك
جاوب يا نظيف!!!
لما المسائل اوى ماعت
والارض بالمتر اتباعت
الناس فى ارض النيل جاعت
فى الشتا والصيف!!
طول عمرى شقيان وباعافر
طب مانتى عارفة الجوع كافر
اناح اركب البحر واسافر
اصطادلى رغيف!!!
ولو غرقت ابقى هاتينى
وف قلب حضنك ضمينى
وبطلى عياط ووارينى
وبدون مصاريف!!
القمح بقى بيجى لنا اعانة
واللقمة متعاصة اهانة
الشله تلهط الا انا
انا اصلى عفيف!!
فبقينا ف العالم عبرة
خارج التصنيف
والحلوة دى قامت تفطر ماقتشى رغيف....
الأحد 5 ديسمبر 2010 - 9:23