لما نحب حد أوي أوي مهما يضايقنا أو حتي يمرمطنا بيبقي علي قلبنا أحلي من العسل
طب لو طبقنا النظرية دي علي حياتنا كلها
هنلاقي اننا لو حبينا ربنا أوي أوي
هنلاقي نفسنا مهما ربنا ابتلانا أو أشقانا فالدنيا بردة هيكون علي قلبنا أحلي من العسل و لا ايه
.
الحياة قصيرة أوي أوي
و ياما شوفنا فيها و ياما لسة هنشوف و كله فالآخر بيعدي و هيعدي لسة الاكتئاب جاي متقلقوش
و متستعجلوش بكرة يبقي ليكوا عيال و تلاقي ابنك او بنتك بمنتهي البجاحة و بخدود مستفزة مكلبظة متصدر فوشك
وبيقولك انو عايز أي حاجة و انتا أو انتي يا عيني يا ويلكم لو ملبيتوش الطلب ، لسة مديركم فالشغل ممكن يطلع غتيت و فمنتهي البواخة ،
حتي حياتنا الحالية اللي كلنا هدفنا و شغلنا الشاغل اننا ننقدها و بنفضل نقول أوووووووووووووف امتي الأيام تعدي بقا و نكون مش
عارف فين بقا و بتاع طب مالأيام هتعدي بس مش لوحديها هتعدي بأشخاصها اللي يا عالم هنشوفهم تاني و لا لأ و هتعدي بلحظاتها
الحلوة قبل الوحشة ، مش عارفة ليه بقول الكلام دا و اللي متأكدة ان محدش هيقراه بعد ما المنتدي بقا زي بيت الأشباح و خاوي علي
عروشه ، طب اهو بمناسبة المنتدي فاكرين زمان لما كان بيحصل مشكلة و الناس تفضل تتخانق و بتاع و نفتكرها نهاية العالم أنا متأكدة
اننا جميعا دلوقتي بنفتكر الأيام و بنشتاقلها جدا دا كفاية لمتنا و صفحات قلوبنا اللي كانت لسة بيضا مخربشتهاش الدنيا و أشخاصها
المرهقين ، أقولكم حاجة عن نفسي قررت من زمان جدا أعيش ببساطة معنتش بتفلسف و لا بفكر فبواطن الأمور لما بمر بمشكلة و ألاقيني
بعيط بغباوة و نفس مفتوحة و مناخيري يمطر بغزارة بقا بفكر للحظة كدا و أقول هوة الموقف الغبي دا هيمتد لآخر العمر ،
الاجابة بتكون لأ طبعا ، طب لزومها ايه بقا التلات أربع أيام نكد اللي الواحد بيعيش فيهم و ينكد علي نفسه و علي أهله و علي عمو أيمن
بتاع المعدية كمان طب ما الموقف كدا كدا هيمر ولا هوة تلذذ بالنكد و خلاص ، استنوا يا قوم بجد تعالوا نقرر قرار اننا ناخد الدنيا من
وشها مش من قفاها ومنفكرش فاللي بيحصل ورا الكواليس ببساطة نتنفس و نعيش و نحب الزمن اللي احنا فيه بأشخاصه بمصاعبه
بطموحاته و بيأسه بانتصارته و اخفاقاته ، علي فكرة دي مش دعوة مني للانفصال عن الواقع و أو اننا نتحول لكائنات مبتحسش عايشة
وخلاص ، لكن دي دعوة للحياة ببساطة و الثقة فربنا مع السعي طبعا ، تعالوا نرحم قلوبنا وعقولنا و نبطل نتنكد و نتفلسف و نتفزلك ،
بكرة بإيد ربنا و و الله بكرة هيبقي أحلي و آخر لذاذة ان شاء الله .
تعالوا نحب الدنيا بكل ما فيها لأننا بالتأكيد بنحب اللي خلقها .
متيجوا نقول كلنا فوقت واحد بأعلي صوت أجمل جملة ممكن ينطقها لسان قلبنا (
أنا بحبك أوي يارب و راضي/ة بكل شيء تقسملي بيه)
و بحبكم أوي انتوا كمان يا كل أهل المنتدي أحلي اخوات و أصحاب فالدنيا و بدعي ربنا من قلبي ترجعوا تاني من كوكب زحل اللي انتوا كلكم هاجرتوا ليه بشكل جماعي 
ربنا يكرمكم يارب و يرزقكم الخير و السعادة اللي تحتل قلوبكم و تعتصم و متخرجش أبدا أبدا 
الإثنين 9 يوليو 2012 - 2:41
...... تسلم ايدك يا حبيبتي 
