كراكيب الروح

كــراكيـب الـــروح

نايم ..
وبفتش جوه الروح
على كراكيب متشاله
فوق رف مكسر
جوه دولاب مقفول
ضايع مفتاحه
وحروف عماله بتلعب
جوه فى قلبى
بتلف تدور فى ضياع
ولقيتنى قايم
أشَطف كل الزهقان
وألملم
طراطيف كلام
إتبعتر منى
فعصت ف عينى
طوحت الراس
كسرت الأفكار الملعونه
وبلعت حروفى
ورجعت أدوب
فى الفرشه
............
.......
وبفتش ..
جوه الروح
وألاقى هناك
أحزان مركونه
وجروح عماله بتنزف
واليوم بيعدى
والفكر مدوب نفسه
جوه مواقع
مليانه أباحه
وكيف بيعلى دماغ
بتشعشع ضلمه
تطفى كل ضمير
بيحاول يصحى
وبلاقى عتامه هناك
تخنق
وبتسرق كل الأفكار
شطيت
وحريقة تقوم فى الفرشه
.............
.........
وبفتش ..
جوه الروح
وبلاقى ضياع و زحام جوايا
زحام على لقمة عيش
طوابير
وأنا واقف مستنى الدور
والعمر بيهرب
ولا مرة نصفنى
أى طابور
وإدانى الفرصة
أكون إنسان موجود
.............
ولقيت الروح
وخدانى وشده إيديه
لبحر غوييييييييييط
مرعوب م الخوف
على بكره
مرعوب من نظره
يرقص جواها عفار
وألاقى سواد
فوق راسى
وألاقى الأرض
تدب نيران
ماتت كام وردة
وصحيت روح
هتصحى أروحنا
................
.........
وبفتش ..
جوه الروح
عن أنفاس مكسوره
والدم يسيب أصحابه
ويسقى فى الجدران
ودموع فحرلها قنايه
جوه خدود ممصوصه
وتل هموم
ما تشيله جبال
بس الروح
.. شيلاه

الشاعر أشرف عزمى

يا ماما
العنوان يخوف اوي
بس اشكرك كلمات جميلة

اكتر من رائع كراكيب الروح 166815

زائر

اولا حلوة عنوان الموضوع كراكيب الروح
بس عجبنى بدايته خاصة

وحروف عماله بتلعب
جوه فى قلبى
بتلف تدور فى ضياع
ولقيتنى قايم
أشَطف كل الزهقان
وألملم
طراطيف كلام
إتبعتر منى

كل ده فى قلبك يا بربر
بجد صعبت علي اوى
ميرسى يا جميل

شكرا يا بربر , كلام حلو ....

4all

all my love

» ** أشواق الروح **
» بكاء الروح
» كيف نتعلم اساسيات جمال الروح
» ن حرارة الشوق............وانين الروح
» عديل الروح و جورج قرداحي تعالواااا نضحك ههههههههه