طهقان زهقان، قرفان؟
يا حرام
معاك شهادة عالية ومش لاقي شغل؟
يا حرام
زهقت من قعدة القهوة؟
يا حرام
مش لاقي حاجة تعملها؟
يا حرام
طب تحب تشتغل إيه؟؟
عندي شغل؟ آه طبعاً عندي إقتراحات كثيرة
عايز تسمع؟؟؟
طب يا سيدي أقولك
ممكن تشتغل سباك، فراش، قهوجي، بياع
طب بس استنى أقولك اشتغل زبال، طب زعلت ليه مش شغلة شريفة وخلاص
طب بلاش اشتغل مكوجي، طباخ، مبيض محارة، طب نجار مسلح
معقول مفيش ولا شغلانه عجباك
طب هقولك عندي لك شغلانة
أقف في محل فراخ
طب ليه بس؟
صحيح ده الفراخ غالية دلوقتي وشغلها مش مضمون
إيه بتقول إيه؟
معاك دكتوراة.. طب وإيه يعني دكتوراة
مش الورقة دي اللي بيدوهالك يفرحوك بيها شوية
مش فرحت؟
طب ارميها وراء ضهرك، ياما كثير زيك راميين شهادتهم وراء ضهرهم وبيبوصوا لمستقبلهم المشرق انت أحسن منهم في إيه بس
طب ده حتى عم محمد صاحب محل الفول والطعمية على على ناصية الشارع
عنده من الورق ده كثير بيلف فيه الطعمية للزباين
وانت كمان بتقول إيه؟
مهندس، طب وإيه يعني مهندس بيعمل إيه المهندس
إيه مهندس طاقة نووية؟
يعني إيه طاقة نووية دي؟ هو احنا عندنا في مصر حاجة اسمها نووية ؟
أنا اللي أعرفة الطعمية
الكوسة
المهلبية
تحب أجبلك شوية؟؟؟
الجمعة 13 مارس 2009 - 0:35
