شيخ الأزهر لـ«عمرو الليثى»: سؤالك عن مصافحة بيريز «سخيف».. وافرض أنى سلمت عليه «هى فلسطين اتهدت»!!...ليس على شيخ الأزهر حرج

في تسجيل صوتى للمداخلة التليفونية التى أجراها الإمام الأكبر الدكتور محمد سيد طنطاوى، شيخ الأزهر، مع برنامج «اختراق» للإعلامى عمرو الليثى، على القناة الثانية بالتليفزيون المصرى، انتقد فيها بعبارات حادة من هاجموه على خلفية مصافحته الرئيس الإسرائيلى شيمون بيريز على هامش مؤتمر حوار الأديان بمدينة نيويورك، ووصف انتقاداتهم، خاصة من يطالبونه بالاعتذار، بأنها «أحقر وأتفه من أن يرد عليها».

وبلغت مدة التسجيل ٦ دقائق و٣٧ ثانية، حذفت منها الرقابة ٣ دقائق كاملة، كان فيها طنطاوى «عنيفاً»، مستخدماً لهجته الصعيدية فى رده على الليثى، لدرجة أنه قال رداً على رأيه فى الحصار الإسرائيلى لغزة: «حصار إيه وقرف إيه؟ وإحنا مالنا»، إضافة إلى قوله: «لا أعلم أن هناك حصاراً على غزة»، كما وصف سؤال للإعلامى عمرو الليثى حول الانتقادات الموجهة إليه بأنه «سخيف».

بدأ الليثى المداخلة الهاتفية بسؤال حول ظروف المصافحة التى تمت بين شيخ الأزهر والرئيس الإسرائيلى، فقاطعه طنطاوى قائلاً: «لأ أنا لست على استعداد لأن أتكلم فى هذا الموضوع»، إلا أن الليثى حاول إقناعه بالإجابة، فقاطعه مرة أخرى، وقال: «هذا أتفه من أن أتكلم فيه»، وعاود الليثى بسؤال: «أنا بس اللى عايز أعرفه حاجة واحدة»، فقاطعه الإمام الأكبر بعنف: «لأ ولا تعرفش، إنت رد على اللى بيقول، ها تعرف إيه؟»

وحاول الليثى تهدئة أجواء الحوار قائلاً: «إنت عارف كلنا بنحبك أد إيه»، وأصر طنطاوى على مقاطعته: «أيوه بس قل لى إنت عاوز تعرف إيه؟.. واحد قابلنى فى السكة سلمت عليه، دى كل المسألة، هو موجود فى مكان، وأنا فى نفس المكان وماشى كده فقابلنى.. مد إيده.. سلمت عليه».

وعندما سأله الليثى عما إذا كان يعرف وقتها شخصية بيريز، رد بهدوء: «معرفش»، ثم تابع منفعلاً: «أنا سلمت على عدد لكن الوجه ده مش غريب علىَّ، وافرض إنى باعرفه.. دى فيها إيه؟ افرض إن أنا اللى سلمت عليه، اتهدت فلسطين؟ ليه ما هو من دولة إحنا معترفين بيها، ومن شهرين كان هنا وقاعد مع الرئيس، إنتم ردوا، بتسألنى السؤال السخيف ده ليه؟ إيه يعنى لما واحد سلم على واحد؟».

وهنا تدخل الإعلامى عمرو الليثى وتحدث مع شيخ الأزهر حول الحصار الإسرائيلى لغزة ومنعه الحجاج الفلسطينيين من عبور الحدود، إلا أن الإمام الأكبر، قال متسائلاً: «هى إسرائيل اللى مانعة الحجاج؟ وافرض إنها عاملة الحصار وإحنا مالنا، الكلام ده كلام سخيف، انتوا يجب أن تردوا انت بتسألنى، واحد بيسلم على واحد دى فيها إيه؟ قول لى، واحد يهودى، واحد مسيحى، واحد ملحد فى حفل عام وماشى سلم علىَّ».

استمرت محاولات الليثى لتهدئة الحوار، وقال: «هو اللى استفز الناس حاجة واحدة بس يا مولانا إن صحيفة (معاريف) الإسرائيلية امبارح نشرت خبر بتقول فيه إن سيادتك روحت سلمت عليه مش هو الذى جاء ليسلم على حضرتك، وعلشان كده إحنا بنستوضح من سيادتك»، فرد طنطاوى: «هما كدابين ولاد ستين كلب، إيه اللى رحت أنا أسلم عليه؟ إزاى أنا هروح أسلم عليه»، وتحدث بعدها عن ظروف دعوته إلى المؤتمر.

ورداً على سؤال الإعلامى عمرو الليثى بشأن الانتقادات التى وجهت له بسبب مصافحته الرئيس الإسرائيلى شيمون بيريز، قال طنطاوى: «دول أتفه من أن أرد عليهم، أتفه من أن أرد عليهم، الأستاذ طلعت السادات رد عليهم، ما تكتفى بالرد بتاعه».

وحول رأيه فى الحصار الإسرائيلى المفروض على غزة، قال طنطاوى: «أنا لا أعرف أن هناك حصاراً على غزة، لا أعرف، هى دى شغلتى أنا كمان؟ ما تسألوا وزير الخارجية فقاطعه الليثى: «لأ أنا أسأل عن رأى فضيلة الإمام الأكبر شيخ الأزهر فى هذا الحصار»، إلا أنه رد عليه بعنف: «حصار إيه؟ وقرف إيه؟ حصار إيه؟ ما الحصار ده موجود من شهور».

وهنا سأله الليثى: «ترد بإيه على اللى بيقولوا إن شيخ الأزهر يجب أن يعتذر عن هذه الصورة»، فرد طنطاوي: «هذا الكلام أحقر من أن أرد عليه.. خلاص!»، وهنا انتهت المكالمة التليفونية.

بداية أحب أعلق على أنه ما كانش يعرفه , يعني رئيس أكبر مؤسسة دينية في العالم ومش عارف شيمون بيريز ! أحد أباطرة الصهاينة اللي هما المفروض أعدائك يا سيدي الفاضل . دا لو كان صحيح يبقى مصيبة ول ماكانش صحيح وسلمت عليه وأنت عارفه ودا المؤكد تبقى المصيبة أكبر , ثانيا بتقول دي دولة أحنا معترفين بيها . هو أنت رجل دولة . دا كلام ناس سياسيين رضوا بالذل دا وبمعاهدة كامب ديفيد 1979 لأسباب مازال عليها خلاف بين السياسيين حتى الأن دخلك أنت أيه بالكلام دا . أنت عالم دين المفروض انك عارف أن الأقصى المدنس حاليا من قبل أعدائك أقل واجب أنك تدين تديييييين ده مش تقول أفرض أني سلمت عليهم هي فلسطين هتتهد لأ مش هتتهد يا أستاذي لكن بتعطيهم شرعية بتعطي للإسرائيليين شرعية في وجودهم وفي أفعالهم , دا ينقلنا للسلام نفسه , فيه كذا نوع من أنواع السلام بتسلم على واحد وانت باصص في ناحية تانية وسلام مقتضب وبتسلم على واحد وانت متجهم لأنك مضطر وبتسلم على واحد سلام عابر بأبتسامة دبلوماسية , لكن سيادتك بتسلم بأدتينك الأثنين زي الصورة مهي موضحة وبأبتسامة عريضة كأنه صديق !!...بعدين بتقول «أنا لا أعرف أن هناك حصاراً على غزة، لا أعرف، هى دى شغلتى أنا كمان؟ ما تسألوا وزير الخارجية " دا على أساس أنك في المنصب دا شغلتك تقولنا إزاي نصلي ونصوم ونستحمى بالخرطوم وبس على كده فين دور الأزهر في مشاكل المسلمين العالمية يا سيد ..لكن زي ما قلت في الأول أنت موظف وليس على شيخ الأزهر حرج... أيه القرف اللي أحنا فيه دا هنلاقيها منين ولا منين يا رب .

ا الراجل معاه حق يعنى يشوف بيريز ويرفض يسلم عليه ده عيب كبير
احنا بينا معاهده سلام
واذا كان على اهل غزه (طظ)
ملحوظه عند اجتياح معبر رفح الفلسطنيين اطلقوا على المصريين رصاص

sir_mohamed awad

sir_mohamed awad كتب:: ا الراجل معاه حق يعنى يشوف بيريز ويرفض يسلم عليه ده عيب كبير
احنا بينا معاهده سلام
واذا كان على اهل غزه (طظ)
ملحوظه عند اجتياح معبر رفح الفلسطنيين اطلقوا على المصريين رصاص

sir_mohamed awad

لا تعليق

sir_mohamed awad كتب:: ا الراجل معاه حق يعنى يشوف بيريز ويرفض يسلم عليه ده عيب كبير
احنا بينا معاهده سلام
واذا كان على اهل غزه (طظ)
ملحوظه عند اجتياح معبر رفح الفلسطنيين اطلقوا على المصريين رصاص

sir_mohamed awad

كلام غريب فعلا
و انت تعلم جيدا انه لن يوافقك عليه احد
لأنك على مايبدو من انصار التطبيع
و بالتالى لا استغرب ان يكون رأيك هكذا
رأينا انه عندما تشارك مصر فى حصار غزة.....و فى حين ان اطفال غزة يموتوا جوعا......فى نفس هذا الوقت كان الأمام الأكبر كما يقال عليه يصافح هذا الجزار
امر واضح جدا
مهزلة

اولا كونى مش مهتم بقضيه غزه ده موضوع قديم لأنى بكره الفلسطنيين باختلاف هما فتح ولاحماس

جميع العرب بيكرهوا المصريين ما عدا سوريا ولبنان انا احبهم ليه

وبعدين لما ابو مازن يسلم على اولمرت بحب وصداقه ده يبقى عيب
ر
شيخ الازهر رمز دينى كبير لمصر واما تكون مصر على معاهده سلام مع اسرائيل

واجب عليه ان يحترم هذه المعاهده
من غير قله ادب كل واحد حر فى رأيه
الاختلاف فى الرأى لا يفسد للود قضيه
ولازم نكون أراء متعارضه لكى نكون ديمقراطيين
sir_mohamed awad

زائر

sir_mohamed awad كتب:: اولا كونى مش مهتم بقضيه غزه ده موضوع قديم لأنى بكره الفلسطنيين باختلاف هما فتح ولاحماس

جميع العرب بيكرهوا المصريين ما عدا سوريا ولبنان انا احبهم ليه

وبعدين لما ابو مازن يسلم على اولمرت بحب وصداقه ده يبقى عيب
ر
شيخ الازهر رمز دينى كبير لمصر واما تكون مصر على معاهده سلام مع اسرائيل

واجب عليه ان يحترم هذه المعاهده
من غير قله ادب كل واحد حر فى رأيه
الاختلاف فى الرأى لا يفسد للود قضيه
ولازم نكون أراء متعارضه لكى نكون ديمقراطيين
sir_mohamed awad

انت بتكلم عن اشخاص كانها اشخاص كويسة
كل الناس عارفة ان المفتى تابع للسلطة
وبعدين مين هو محمود عباس ابو مازن هو ايضا للاسرائيل
هو لو كان مش عميل كان ساب شعب فلسطين فى ظلام دامس وفى جوع بسبب الحصار على غزة هو ده رئيس السلطة الفلسطينية
بيتهيئلى ولاانه رئيس حركة فتح فقط وحماس دول اصبحوا من دولة اخرى
ومن مش مستغرب من تسليم المفتى لشمعون بيريز لانه تابع للسلطة واسرائيل
وبعدين يبقى ده ديمقراطية علشان اختلاف فى الراى انا غير متفق معاك
احنا نختلف بس فى راى لكن نختلف على انك من خلال رايك على اللى حصل يبقى ده اختلاف فى الراى
لالالالالالالالالالالالالالالالالالالالالالالالالالالالالالالالالالالالا مش متفق معاك يا صديقى دى ثوابت عربية لا نختلف معها ابدا ابدا
شكرا

sir_mohamed awad كتب:: ا الراجل معاه حق يعنى يشوف بيريز ويرفض يسلم عليه ده عيب كبير
احنا بينا معاهده سلام
واذا كان على اهل غزه (طظ)
ملحوظه عند اجتياح معبر رفح الفلسطنيين اطلقوا على المصريين رصاص

sir_mohamed awad

دي ديماجوجية شديدة :shock:

Noha كتب:

sir_mohamed awad كتب:: ا الراجل معاه حق يعنى يشوف بيريز ويرفض يسلم عليه ده عيب كبير
احنا بينا معاهده سلام
واذا كان على اهل غزه (طظ)
ملحوظه عند اجتياح معبر رفح الفلسطنيين اطلقوا على المصريين رصاص

sir_mohamed awad

دي ديماجوجية شديدة :shock:

جبتى من الأخر يا نهى
ربنا يديلك الصحة

سلام عليكم جميعا
أنا أحب أرد على sir_mohamed awad

أولا : بالنسبة لشخص بينادى بالديموقراطية فكلام حضرتك عنصرى جدا . سواء ضد الفلسطينييين
أو لصالح اللبنانيين و السوريين . و أحب أقول لحضرتك إن العنصرية نقيض الديموقراطية

ثانيا : المعاهدة بين حكومة مصر و حكومة اسرائيل .. مش بين الشعبين " و دى غلطتنا كشعوب
اننا نقبل بوجود وضع غير سوى زى دا "
لا يمكن بأى حال من الأحوال إن يكون فيه سلام بيننا كشعوب عربية و بين اسرائيل
و أفتكر لو سألت أهالى الجنود و المدنيين المصريين الللى بيموتوا كل سنة ع الحدود برصاص
اسرائيلى هيقولولك فيه سلام بيننا و للا لأ .. لو سألت واحد من اللى داقوا مرارة الذل فى 76
أو فرحة لمس تراب سينا فى 73 هيقولولك فيه سلام بيننا و للا لأ .. لو سألت أسير مصرى
من الأسرى القليلين جدا اللى رجعوا عايشين من النكسة هيقولولك فيه سلام بيننا و للا لأ.

اللى بجد مش قادرة أفهمه هو انك مش مهتم بقضية غزة و فلسطين .. مش هقوللك اننا كلنا عرب ..
هقوللك ان فيه عائلات نصها مصرى فى رفح المصريه و نصها التانى فلسطينى فى رفح الفلسطينية
يعنى ازاى هيكون فيه سلام بينى و بين اللى هتك عرضى و دبح أمى و أسر أبويا و قتل أخويا
و داس على أختى .. مش ممكن

السلام دا مش ممكن يكون مع مجرمى حرب .. مش بسألك باسم اللغة و لا الدين " سواء إسلام
أو مسيحية " .. بسألك باسم الانسانية :
ازاى أحط ايدى فى ايد المسئولين عن صابرا و شاتيلا .. دير ياسين .. قانا .. و غيرها كتير
مدابح بتحصل كل يوم ؟؟؟.. كل يوم فيه بشر بيموتوا غالبيتهم أطفال عشان احنا جبناء و مش
قادرين ندافع عنهم .. كمان هنقتلهم بادينا ؟؟؟؟؟؟؟

freekeko كتب:: سلام عليكم جميعا
أنا أحب أرد على sir_mohamed awad

أولا : بالنسبة لشخص بينادى بالديموقراطية فكلام حضرتك عنصرى جدا . سواء ضد الفلسطينييين
أو لصالح اللبنانيين و السوريين . و أحب أقول لحضرتك إن العنصرية نقيض الديموقراطية

ثانيا : المعاهدة بين حكومة مصر و حكومة اسرائيل .. مش بين الشعبين " و دى غلطتنا كشعوب
اننا نقبل بوجود وضع غير سوى زى دا "
لا يمكن بأى حال من الأحوال إن يكون فيه سلام بيننا كشعوب عربية و بين اسرائيل
و أفتكر لو سألت أهالى الجنود و المدنيين المصريين الللى بيموتوا كل سنة ع الحدود برصاص
اسرائيلى هيقولولك فيه سلام بيننا و للا لأ .. لو سألت واحد من اللى داقوا مرارة الذل فى 76
أو فرحة لمس تراب سينا فى 73 هيقولولك فيه سلام بيننا و للا لأ .. لو سألت أسير مصرى
من الأسرى القليلين جدا اللى رجعوا عايشين من النكسة هيقولولك فيه سلام بيننا و للا لأ.

اللى بجد مش قادرة أفهمه هو انك مش مهتم بقضية غزة و فلسطين .. مش هقوللك اننا كلنا عرب ..
هقوللك ان فيه عائلات نصها مصرى فى رفح المصريه و نصها التانى فلسطينى فى رفح الفلسطينية
يعنى ازاى هيكون فيه سلام بينى و بين اللى هتك عرضى و دبح أمى و أسر أبويا و قتل أخويا
و داس على أختى .. مش ممكن

السلام دا مش ممكن يكون مع مجرمى حرب .. مش بسألك باسم اللغة و لا الدين " سواء إسلام
أو مسيحية " .. بسألك باسم الانسانية :
ازاى أحط ايدى فى ايد المسئولين عن صابرا و شاتيلا .. دير ياسين .. قانا .. و غيرها كتير
مدابح بتحصل كل يوم ؟؟؟.. كل يوم فيه بشر بيموتوا غالبيتهم أطفال عشان احنا جبناء و مش
قادرين ندافع عنهم .. كمان هنقتلهم بادينا ؟؟؟؟؟؟؟

بجد يسلم لسانك يا فريكيكو جبت من الأخر