نفسك تتكلم إنجليزي وتتعلمه بحق وحقيقي ؟

أولا : الإنجليزى مش جرامر أرمي الجرامر في "الزبالة" , حتى في الأمتحانات يا طلبة مفيش سؤال بيسألك في القواعد . أحنا الشعب الوحيد على حد قول دكتور المقال السنة اللي فاتت اللى بيهتم بالقواعد وبيحفظها صم لكن ملخبط في اللغة نفسها!
علشان أوضخلكم المسألة بالظبط كأن واحد من إنجلترا عايز يتعلم عربي فبدل ما بنعلمه في البداية كلمات بسيطة وكام جملة بنقوله كان وأخواتها وإن أن كأن كأن ليت لعل ...أكيد هيتعقد من حياته مش من اللغة وبس .

ثانيا: المخ بالظبط زي أى عضلة كل ما يتمرن كل ما يجيب نتيجة أكثر ...درب مخك , دربي مخك بالإستماع , يعني لو كل يوم فتح التليفزيون على إم بي سي فور عل نشرات الأخبار الأمريكية الساعة 6 الصبح "معاد رخم لكن ميزته أن مفيش ترجمة " بلاش دا , cnn أو BBc أو حتى راديو bbc , معندكش حجة إحتمال متفهمش غير 5% بس من اللي بيتقال لكن صدقوني كل يوم بسبب تدريب "عضلة" المخ لازم هتزيد 1% إستيعاب .... هتعرف تلاحق بعد كدا معظم الكلام اللي بيتقال من غير ما تقرأ الترجمة سواء كان في أفلام أو مسلسلات أو حتى برنامج أوبرا شو ,

ثالثا: المحادثة جربت كام مرة قبل كدا تتكلم مع واحد صاحبك أو تتكلمي مع واحدة صحبتك عايزة تتقن اللغة زيك بالإنجليزي , من غير هيء هيء وهأ هأ! جرب كدا مرة لك بعد ما تكون دربت نفسك أزاي الناس دول بيتكلموا لأ هتلاقي أن بمقارنة النطق بتاعهم للنطق اللى أحنا أخترعنا في معاملنا إن دي لغة تانية خالص.

رابعا : مهم جدا جدا حفظ الكلمات , ومش معني حفظ الكلمات أنك تفتح القاموس اللي عندك وتقول بسم الله لنبدأ الحفظ !>>>الكلمات ملهاش ترتيبات ولا أولوية هات قطعة أي قطعة , وأقراها و متتعقدش لو مفهمتش نصفها بالعكس برمج مخك أنه يفرح بنصف الكوب الممتلىء , وبعدين أقراها مرة كمان في المرة الثانية طلع الكلمات الصعبة بكرر في المرة الثانية , ترجم الكلمات الصعبة وتذكر إن معظم الأحيان الكلمة في القاموس ليها كذا معني فحاول تطابق أصح معني في سياق المقالة أو الجملة , بعد ما تحفظ الكلمات الصعبة كويس (في ملحوظة بشأن القواميس والحفظ هتكلم فيها دلوقتي ) أقرأ المقالة مرة ثالثة دلوقتي هتقراها بثقة أكثر بدون عقد , أقرا بصوت عالي وأنت في أوضتك لوحدك أو في مكان في البيت لواحدك علشان متتكسفش لين لسانك على الأخر قلد نطق الأمريكان للكلمات , متشنجش لسانك وتقول لحسن أخويا يدخل عليا يسمعني أتكسف !,, خليك جريء وأكتشف روح ثانية جواك روح بقالها 20 سنة عايشة في كاليفورنيا الكلام على لسانها زي المياه , بجد والله هتفرق معاك جدا.... يا شباب وأنتوا رايحيين تعملوا interview لأي شغلانة محتاجة لغة لو سمعوا نطقكم هتبقي فضيحة ومتقولش مهو كله بينطق كدا , صدقني هتكتشف إنك غلط , فألحق نفسك وعدل نطقك من دلوقتي.

بقينا في أيه أه خامساُ: القاواميس أنا شخصيا بفضل قاموس longman أيوة بتاع ثانوي اللي بيوزعوه علينا في المدارس دا , اللي أنت بعته لعم سلامة بتاع الفول والطعمية علشان يلف فيه الطعمية قصاد جنيه طرشي , وبالرغم من أن عندي كذا قاموس خارجي لكن longman أحسن طريقة لفهم الكلمات , بيشرح الكلمات وبيجيب عليها أمثلة وبيعلم طريقة نطقها برموز معينة ولما تنظر في أخر القاموس هتلاقي أن كل رمز له طريقة نطق معينة فتعرف أزاي تنطق الكلمة , بالنسبة للحفظ لو في كلمة وقفت معاك كلمة طويلة كلمة نطقها مقلبظ أي حاجة من دي ودا أكيد هيحصل , هات ورقة وأكتب فيها مجموعة الكلمات الصعبة وضع الورقة دي أمامك على الكمبيوتر على المكتب في شغلك المهم كل ما هتتكرر الكلمات دي معاك هتلاقي نفسك حفظتها كدا من الهوا (وأبقى أدعيلي).

أبدأ بخطوة واحدة , هتلاقيها جرت معاك ألف خطوة ...التعب فقط في أول خطوة , خلي عندك جرأة وخدها .