صعب جدا
انى اشوف مسؤول كبير وبيرتشى
لما ناس تقلع هدومها ما تختشى
صعب جدا
لن ايد تزرع ولا تلقاش حصاد
لما نمسك بندقية بدون ذناد
لما نرى--- وماتلاقيش غير العناد
والللى اصعب
ان بلدى -- يعرضوها فى المزاد
صعب جدا
انى اكون عطشان واسيب البحر يشرب
لما يبقى عدو اخويا ليا اقرب
لما يكره حد نفسه ومنها يهرب
واللى اصعب
انى اشوف ميت واضرب
صعب جدا
انى اخاف انطق فى يوم كلمة شهادة
انى اسمى الخوف من الظالم عبادة
انى اعيش مهزوز ومسلوب ارادة
واللى اصعب
انى انافق لجل اصحاب السيادة
صعب جدا
ان ابسط حق ليا يكون محال
لما اصدق ان كل يمين -- شمال
او اشوف نفسى الفريد وماليش مثال
واللى اصعب
لما يبقى الحل فى ايدين العيال
الثلاثاء 6 يناير 2009 - 13:18
