كلنا انسان

قَلَعت كل القلادات
وكلّ الزينات والانتماءات

خلعت حتى لِبسي
وقعدت ويا نفسي

تحت شجرة برتقان

وطال بيا الوقت
سرحت كتير ... ونِمت

ولما صحيت ... لقيت
كتير ... حواليا واقفين

عليا باصّين
مبحلقين

اللي يقول كان مسيحي
واللي يقول كان ملحد

واللي يقول كان بهائي
واللي يقول كان مسلم

وكان هندوسي
وكان بوذي
وزرادشتي ويهودي كان

وواحد قال ده كان خرفان
وواحد قال ده كان عريان

برّقوا وحسِّسوا ودعبِسوا كتير أوي كمان

:

لكن ولا واحد بـ أي زمان
في أي مكان

شاف حقيقة حقيقتي الحقيقية

:

:

:

كان إنسان