فوق
أنا نمت في يوم وصحيت
ببص فجأة لقيت
روحي في وسط ميدان
الصمت فيه عنوان
فجاة لقيت إنسان
يجري كما الرهوان
يصرخ يقول ثوار
ثوار
دا عبيط ولا حمار ؟!!!
إزاي يقول ثوار ؟!!!
فينك يا أمن الدولة ؟!!!
فين الحديد والنار ؟!!!
فين الجزم كرابيج؟!!!
تخلى الشديد ينهار
تخلي الدماء تنزف
تجري كما الانهار
ثوار
فجاة لقيت أنسان
يجري وهو كمان
يصرخ يقول ثوار
ثوار
قولولي يا جدعان
دي مصر ولا أيه؟!!
والناس بتجري ليه؟!!
تصرخ تقول ثوار
فجأة لقيت ملاين
بشر زى التتار
كنا زمان راضيين
نأكل ونبلع طين
واللي يقولوا عليه
نصرخ نقول أمين
علشان نعيش سالمين
وشيخنا أبو عمه
يقول كونوا قانعين
علشان نزور الجنة
ونهزم الشياطين
الشعب نصه أدروش
والباقي دول هايصين
والشعب عاش متهمش
كان كل همة يعيش
يشرب ويأكل عيش
وبرضوا كان ما يضرش
يشرب كمان حشيش
يعيش في علبه وكوخ
يعيش كما الحرافيش
عايش حياته فى ضلمه
عايش كما الخفافيش
كان كل هم الدوله تقصقص طويل الريش
لكن خلاص يا ناس
الشعب كله ثار
داق الهوان انهار
والطعم كله مرار
قضى حياته فى ضلمه
ولا شافش ليها نهار
ماعدتش تنفع كلمه
يقولها لنا فشار
والشعب كله ثار
فجاة لقيت العسكر
ضربوا علينا حصار
وجالنا واحد باشا
هادى وكله وقار
على كتفة نجوم وسيوف
والنسر بينها شعار
وقف يصرخ وقال
مالكوا كدة يارعاع
دا الشعب كله باع
أمشوا وإلا حياتكم
حيكون مصيرها ضياع
................................
وسع ياعم البيه
اوعي تقولى ليه
اللي يسد طريقنا
حندوسه من غير ليه
......................
دا الشعب كله ثار
يهتف يقول ثوار
حنشق الليل نهار
داق الهوان انهار
والطعم كله مرار
عشنا كتير أخيار
ما شفنا الاالعار
والسوط معاة النار
لازم نكون أشرار
علشان نعيش أحرار
وسع كدة ياحمار
دا الشعب عقلة طار
والضلمة جالها نهار
.................................
بينا يا ثوار
على أمير الدار
هو هناك في قصره
غارق في بحر نعيم
واحنا نعيش في جحيم
والله كمان مش عجبة
عايز يولى نجله
فاكرنا مش فاهمين
ولا كأننا شايفين
أنتا فاكرنا مين
أحنا بني أدمين
مصر دي مش عزبة
مكتوبة بأسم أبوك
.....................
فجاة ظهر الزعيم
ووشه كله عروق
وقال في رقة وزوق
ياولادي اصحوا النوم
.......................
اصحي يبني من النوم
اصحي يبني من النوم
فوق
فوق
فوق
خلاص صحيت ياماما
الأربعاء 22 يوليو 2009 - 7:39
