هتقضي الأجازة في أيه ؟...تعالى يمكن تستفيد .

الأجازة الأجازة يا عيني ع الأجازة ...جه الصيف أخيراً وأنتهى ضغط الأمتحانات , طيب ناوي تعمل أيه ؟

طول عمرنا وإحنا صغيرين بنسمع كلام من كثر ما بقينا بنسمعه بقى دبش , بقى دباجة ملهاش لازمة , لما تيجي الأجازة أقرأ , ألعب رياضة مش عارف أعمل أيه , فبقى الكلام دا بالنسبة لينا مرتبط باللوحة المتعلقة في الفصل أو بالتعليمات المكتوبة على ظهر كتاب العربي أو العلوم ! ...طيب فكر بشكل تجريدي فكر بشكل مختلف ومش هتندم ...أنت عندك أيام كثيرة أوي أوي فاضية 3 شهور تقريباً متيجي تستغلها علشان تصنع من نفسك شيء مختلف , أصنع من نفسك شخص أنت لو قابلته بعد 3 شهور هيبقى منى عينك تتعرف عليه ! ...مش معنى كلامي دا إنك هتقضي أجازتك في معتقل , بالعكس أخرج أحسن خروجة وأتمشى في أحسن الأماكن وأقعد في أحسن كافيتريا وأضحك من قلبك وشوف ناس جديدة وأتعرف على حجات جديدة , لكن بالتوازي هتلاقي عندك وقت كتير جداً فاضي . وقت لو أستغليته هتصنع من نفسك شخص لو أنت قابلته بشكلك الحالي زي ما قلت بعد ال3 شهور دول هيبقى نفسك تتعرف عليه . طيب أزاي ؟

بداية أكتب في ورقة أيه هي الصفات اللي تتمنى تشوفها في شخص , أكتب وسيب خيالك يسرح زي ما هو عايز

بيلعب رياضة

مثقف

متدين

بيعرف لغات

ذكي

حافظ قرآن

كل دي حاجات ليها تأثير مباشر على شخصية اللي بيمتلكها , بعد ما تجمع كل اللي نفسك فيه أبدأ فصل النقاط دي , على سبيل المثال

الرياضة : أنا بعرف ألعب أيه ؟ أيه الرياضة اللي كنت بحبها وأنا صغير وأعجبت بيها جداً لكن للأسف ظروف الحياة بعدتني عنها . سباحة - سلة - كونغفو - كراتيه - كمال أجسام - جري .

وبعدين شوف هل فيه حد بيدرب الرياضة دي , أو فيه مكان تقدر تزاولها فيه ؟ لو فيه روح فوراً وقدم , أشترك في صالة - روح الأستاد - لو أزمت معاك أوي , عليك وعلى تمرينات اللياقة في البيت (ضغط- بطن- تمرينات إطالة) , مش معضلة , المشكلة الوحيدة هي إنك تقدر تستمر ولو نصف ساعة في اليوم . لو صليت الفجر ونزلت جريت على النيل , النيل بيبقى فاضي في الوقت دا , يا سلام على الشعور الجميل . أو أجري في تراك الأستاد أو الساحة . أدخل في القسم الرياضي هتلاقي مواضيع هتفيدك إن شاء الله .

طيب دي الرياضة بالنسبة للثقافة : أقرأ ...دي كانت أول كلمة في دينك فاكر !. أقرأ ولو نصف ساعة في اليوم في أي حاجة . المحصلة النهائية ليك بعد 3 شهور هتكون رهيبة . مفيش حاجة أسمها مبحبش القراءة أو بتفكرني بالأمتحانات .. جرب كدا تدفع فلوس في كتاب من مالك الشخصي . أنزل أي مكتبة ونقي كتاب في أي مجال أنت بتحبه , وساعتها النتيجة هتختلف , الفلوس مزنقة معاك اليومين دول , طلع من جيبك جنيه ونص وروح على مكتبة مبارك أقطع تذكرة وأقعد طول اليوم هتلاقي مكان جميل جداً وكتب لو قلت كلمة رائعة هبقى مبوفيهاش حقها . جرب بس وأفتح كتاب في أي مجال أنت بتحبه ..تاريخ , سياسة , علم نفس , علوم , قصة , تنمية بشرية . أول صفحة أو أتنين قرايتهم جايز تكون صعبة شوية , بس لما هتركز , وتبرمج دماغك على مواصلة القراءة وتتعب عضلة المخ شوية هتلاقي عندك بعد أسبوع واحد من الأستمرار في القراءة , إدمان ليها .

التدين : أنا عن نفسي مبحبش أتقمس شخصية الواعظ , لكن لو ربنا كارمك وبتصلي الخمس فروض , طيب ما تجرب تنزل تصلي في الجامع لمدة أسبوع فرض واحد , أختار أنت أي فرض من الخمسة , ولو بتسألني يبقى الفجر أو العشاء , وواظب عليه لمدة أسبوع متتخلاش عنه مهما حصل . خليه المحور ,أو المركز بتاعك , علشان بعد كدا لما تزود في الفروض اللي هتصليها في الجامع متلقيش اللي بنيته كله بيقع مرة واحدة , "إن هذا الدين متين فأوغل فيه برفق ولا تبغض إلى نفسك عبادة الله" يعني متخليش نفسك تكره العبادة . حاجة تانية ممكن تعملها , جرب تصلي في وسط الليل , الساعة 2 أو 3 يا سلاااااام على الراحة والسكينة اللي هتحس بيها , المرة دي صلي بشكل مختلف , متصليش روتين زي كل مرة , لأ حس فعلاً إن كل الناس نايمة وأنت لوحدك واقف مع ربنا .وحجات تانية كثير ممكن تعملها , لكن المفتاح هو التدرج .

اللغات والدورات : عايز تتعلم لغة أو تأخد دورة في أي حاجة , متتأخرش , قوم فوراً أرفع سماعة التليفون وأسأل عن الدورات المتوفرة في أي مركز تنمية بشرية أو مكتية أو حاجة تبع كليتك , عندك تليفون مكتبة مبارك مثلاً 371104 , قوم ومتديش نفسك فرصة تيأسك أو تحط في مخك أي أفكار توقفك . لو نفسك تتعلم إنجليزي , يبقى دلوقت مش بكرة , لو نفسك تأخد دورة ICDL يبقى دلوقت مش بكرة . لو فيه دورة تنمية بشرية سمعت عنها ولقيت سعرها مناسب , طيب أيه اللي منعك , كل الناس من حواليك دلوقت بيتحركوا وبياخدوا دورات , مش علشانها موضة , لأ علشانها سمة العصر دا , لأنك من غيرها هتبقى غريب هتيجي تتكم مع ناس هتحس إن عقلهم سابق عقلك بمراحل بالرغم من إن السن واحد , قوم ومتديش لنفسك فرصة تحبطك . عندك في قسم غير حياتك هنا في المنتدى معلومات ممكن تفيدك جداً .

الذكاء : الذكاء هبة من عند ربنا , لكن فيه تمرينات ممكن تمرن الذكاء , منها إنك تتعلم أسس التفكير المنظم , تلعب ألعاب ذكاء , شطرنج , سودوكو , كلمات متقاطعة ..إلخ

النقطة دي عندي ليكوا موقعين حلوين أوي للشطرنج :

http://www.chesscube.com/play/registered.php?loggedOut=true

ودا للسودوكو بأربع مستويات مختلفة :

http://www.websudoku.com/

حفظ القرآن : يا سلام على الطاقة اللي هتنضاف لعقلك لما تحفظ قرآن , جرب أحفظ كدا في اليوم آية واحدة , أبدأ بجزء عامة , أو بسورة أنت كنت حافظها زمان ونسيتها للأسف , أو بسورة لما بتسمعها للشيخ الفلاني بتطرب لصوته أو بسورة أنت متعلق بآياتها . جرب كدا , ممكن تبقى صغبة عليك برضه في الأول , لكن لما هتلاقيك فجأة حفظت صورة كاملة , دا هيشجعك على التانية والتالتة والعاشرة , لو التجويد عندك بايظ , فيه ولله الحمد في كل الدنيا أمكن لتحفيظ القرآن وتعليم التجويد في مساجدنا وبرة المساجد كمان . المهم إن حفظ القرآن هيفرق جداً معاك . أقترح عليكوا المكان دا لتعليم التجويد أنا رحت وأستفدت جداًُ جداً , مش من تعليم القرآن وبس , لأ ونقاشات ممتعة بتحصل وتفسير عصري للآيات وطبعاً مجاني ...جمعية مصر للثقافة والحوار : امتداد كورنيش النيل -عمارة الدكتور فؤاد سالم- , بجوار كافيه البارون ت: 379880




بعد الكلام دا إن دلوقت قدامك خيارين , يا تغير نفسك لشخص أي حد نفسه يتعرف عليه ويتمنى صداقته , والناس بتقلده . يا تفضل زي ما أنت جيت للدنيا صفر وخرجت منها صفر .

شكراً ليكي يا شيمو , ربنا يخليكي رفعتي من روحي المعنوية