رباعيات شاب مجنون

بناءا على رغبه العضو سكوربيون

هانشر رباعياتى

الموجوده فى موضوع رباعيات منى وليك

بشكل متسلسل فى الموضوع ده

حتى يتسنى لى المشاركه فى المسابقه الادبيه

اتمنى تعجبكم






مـــاشي بقلب مهموم حزين

مش عارف شمال ولا يمين

تايه فى دنيا كبيره

مش سامع غير ااه وتنهيده

وعجبي !!!





قادر تحلم يا قلبي

والحلم بالنسبه لك اكبر امنيه

احلم واحلم يا فؤادى

بس دمعتك ما تنزل الا على شيء غالى

وعجبي!!!





فنان وفى لحظه انسجام

رسم يمامه وانسان

الانسان صاد اليمامه

بقي كده يا زمان معدش فى امان

حتى فى رسمه بالالوان

وعجبي!!!!





ويفيد بايه الندم

مالناش سلطه على الزمن

اللى راح راح

ومفيش غيرى بيدفع التمن

وعجبي!!!!






صارعت الزمن واتحديته فى يوم

وفى لحظه فرحت و شفت النجوم

قالولى قوم يا موهوم

انت اتهزمت و على ظهرك وقعت

وعجبي!!!



يا دنيا فيكى العبر

كل عبره بدمعه وكل دمعه بالم

وكل الم بدرس وكل درس بفايده

وكل فايده وانت طيب





مريض يا قلبي وعلتك الهوا

كتير بدور على الدوا

مين مسؤول عن حالك؟؟

حبيبك ؟؟؟ قول له محتاجك

وعجبى!!!





قلب وقلب واتقابلت القلوب

ما تخافش يا قلبي, وحيد مش هتكون

ما هو برضه ربك رب قلوب

وعجبي!!!!



حزين ومهموم باشكيلك

مفيش غير انى احكيلك

ولا عمرى فى يوم هاسيبك

من مولدى ولغايه لما اجيلك

يا رب


غريب يا قلبي بين القلوب

طريقك غير كل الدروب

مليان اه والم واحساس بالشرود

يا هل ترى كسبت يا قلبي ولا مغلوب

وعجبي!!!!


قلبي فرح , واتملى بهجه وسرور

حبيبه قريب منه ,خجول وشه احمر من الكسوف

فى لحظه اتغير وكالبركان بدا يثور

فهمت بسرعه ان جه عليا الدور

وعجبي!!!!



ااااه منك يا دنيا يا فانيه بترخصي كل شيء غالى

الحب بقي صفقه فيها البايع وفيها الشارى

هتبيع يا قلبي ولا هتشترى ولا هتدارى

انا عارف انك عمرك ما تقدر تكون خالى

وعجبي!!!



اول ما شفتك اتغير حالى

البسمه ليا دوا وانتى الشافى

قربت منى وظهرت ضحكتى

عرفت ان انتى نصيبي وقسمتى

وعجبي !!!!



الدنيا سيرك كبير فيها انت وانا وكل الغلابه

مهرج غلبان بيضحك وقلبه حزين وبيدعى البلاهه

و فيه اللى بيلعب بالبيضه والحجر بكل بساطه

وفيه ال ى ينشل قلبك بكل بجاحه

وفيه جمهور بيتفرج بكل بلاده

وعجبي!!!!


عجبت لك يا صنف النساء على كل شيء قادر

تجيب وتودى راجل بشنبات ما هو لعبه فى الاول وفى الاخر

اللوم على الراجل اللى المفروض تاجر شاطر

يبيع ولا يشتريش وعلى كل شيء قادر


و الف عجبي !!!!!






بصيت لنفسي وما عجبتنيش

لقيت انسان جواه مفيش

شكل وروح وقلب وفكر

وعقل وطموح بيساوى صفر

وعجبي!!!!





الف اه ويا ندم على كل اللى فات

حبيبك يا قلبي قصادك تتمنى منه الالتفات

اه قريب منه وهو مبتغاك

شايفه ماشي قصادك مش قادر تقوله يستناك

وعجبي!!!!




دنيا وقالوا عليها غروره تشدك مهما كنت بتكرهها

يا ابن ادم انت مش قدها ولا قد اغرائها

كتير قبلك اتحدوها وحبوا يعرفوا اسرارها

سيبك منها ما هى فانيه اهم حاجه هتبقي من اخيارها ولا اشرارها


وعجبي!!!!

تسلم ايدك بجد حلوين اوى الرباعيات
موهبتك واضحة استمر فى الكتابة وحاول تحب الشعر والخواطر هتبقى حلوة من قلمك واحساسك اكيد
بالتوفيق