ما شربتش من نيلها ........ولا عايز اشرب

ازيكم يا مينز ويا وومينز
بجد انا مش عارفة مصر دي ايه
والناس اللي عايشن فيها دول تصنيفهم ايه
بصراحه انا مش عارفةلو ماكنتش مصري كنت هابقي ايه
وكنت هاعيش ازاي
سبونا من الشعارات والافلام الهندي الممله اللي عمالين يحفظوها لنا من واحنا صغيرين
وبلدي بحبها
ومصر ام الدنيا يا عمرو
وقريبا وابو الدنيا واخت الدنيا
والكلام الفاضي ده كله
انا مش عارفة هما عايزين ايه من البلد دي وعايزين يعملوا فينا ايه
زمااااااااان
خدنا صفر كبير في المونديال واتفضحنا وسط العالم كله
وطلع بتوع مجلس الشعب والشوري والكلام الفاضي ده كله كل واحد يقول كلمتين ونحاسب المسئول ونحاسب مش عارف ايه
ونام الموضوع ولا عرفنا ايه القرار اللي خدوه ولا هانعرف
واخونا الاعلاميين بتوع الهيصه مع الزفه كله نام واتغطي
ونهايه الموضوع احنا بس اللي تحرق دمنا
النهارده
في الاوليمبكيات بسم الله ما شاء الله
انجاز ما بعده انجاز
الفراعنه اللي جايين من ام الدنيا اصحاب المعدن الاصيل اللي بيظهر وقت الشده
فرحتنا بيهم ما تتوصفش
زي ما راحوا بكين زي ما رجعوا
والله ماكسوف لهم
ميداليه برونزيه يتيمه جت من عند ربنا
وطلع كلام اخونا المسئولين
اللي صدعوا راسنا بمشروع البطل الاوليمبي
والملايين اللي تصرفت في مشروع البطل الاوليمبي اللي انا اصلا ما عرفش ايه هو المشروع ده
بس ما تقلقوش هو موجود
والدليل الانجاز العظيم اللي عملناه والبرونزيه اللي حصلنا عليها واللي هي تعادل 55 ذهبيه و40 فضيه
عشان هي جت بشرف وبمجهود فرعوني اصيل
انا اللي اعرفه ان الانسان لما بيوصل لمستوي بيحاول يطور نفسه ويبقي احسن
يعني لما في اثينا نجيب 5 ميداليات الطبيعي في بكين يبقوا 10
انما تقول ايه وتقول لمين
ما خدناش بردك غير حرقه الدم
هل يتري هايحسبوا المسئولين عن اهدار المال العام من اعدادات وهميه وسفر لبكين لحصد الخيبه والعوده للقاهره
ولا هايعتبروا الميداليه البرونزيه انجاز
حد هايتكلم عن خيبه اليد والطايره ولا بقي شئ عادي
الطاير اللي شويه يضحكوا علينا ويقولولنا الدوري العالمي ده خير اعداد للاوليمبكيات ونسكت
ولما نتفضح في بكين يقوولك اجهاد لان اللعيبه بذلت مجهود كبير في الدوري العالمي
واليد اللي بقالنا سنين ما سمعناش عن اي حاجه عملوها
ووبعد كل اخفاق يطلع حسن مصطفي رئيس الاتحاد المصري لكره اليد
يكلمنا عن الاستفاده الرائعه من البطوله وازاي هاتأثر في اداء المنتخب في الفترات القادمه
وبعد كل اخفاق يخرج بتصريح انتظروا المنتخب المصر في البطوله القادمه
كما حدث بعد فضيحه بكين فانتظروا فضيحه اخري في كأس العالم في يناير القادم
والله يرحم ايام اشرف عواض وحازم عواض وجوهر نبيل واحمد بلال وعمر الجيوش والجيل الذهبي لليد
وهل اخونا افي الاعلام حد فيهم راجل يفتح الموضوع ويسأل الناس دي ولا كالعاده شويه فرقعه في الاول ويناموا بعد كده وينيموا الناس معاهم
وفين البرامج اللي مصدعه دماغنا في الفضائيات من اللي حصل في الصين
فين شوبير والغندور وشلبي الخ
ولا تشفير ماتشات الاهل هو اللي بيوجع بس
ومهاجمه جمهور الاهلي بعد ماتش المصري هوالاساس
ولا ايه حكايتكم زهقتونا
*فين اعلامنا الموقر
من فضيحه بكين وقصدي ما الفضيحه مش الميداليات اصل بكين كان كلها فضايح
فضيحه المره دي حسن صقر مع حسن مصطفي
البهوات اللي راحين يتخانقوا في بكين
وفضحونا قدام الاجانب
وكل واحد حكي قصه من عنده
يبرئ نفسه
والخاسر هو مصر
فين الاعلام من كشف الكذاب اللي فيهم
وفين المسئولين من بتر امثال هذه الشخصيات المفضوحه والتي لا تضع سوي مصلحتها في المقام الاول
ويأتي مصلحه وسمعه بلد باكملها تحت اقدامهم
فين المسئولين عن رفع الاثقال اصحاب القرارات الحكيمه
فين اللاعبون واللاعبات الذين يعدوا منذ اربع سنوات للمنافسات
فين البهوات اللي شطبوا نهله رمضان
من البديل الذي تحت ايديكم وقمتم بتجهيزه لينافس في الدوره
ام ليس هناك لاعبات في مصر سوي نهله
ام هناك لاعبات لم تجد مكان يصلح لتدريب البني ادمين
وسوؤال اخير
هل اتت احداث الدوري المصري
وطلب الاهلي بنقل مباريات علي قناته الخاصه
وماحدث في لقاء الاهلي والمصري وغيره من اللقائات
في صب اهتمام الاعلام نحو هذه التفاهات وغض البصر عن ما يحدث في بكين

والله الواحد زهق من البلد ديومن اللي فيها
اصبح لدي الشخص نوع من الاحباط تجاه اي قرار واي مسئول
كلهم كذابين
والمشكله انهم عارفين انهم كاذبين واننا عارفين انهم بيكذبوا والرخامه بقي انهم بيكذوا بردك
اعلام واعلاميون في الضياع
مسئولين لا يعلمون شيأ عن المسئوليه
ونحنالجمهور هو الخاسر الوحيد
نحن من نصاب بارتفاع ضغط الدم والسكر والحصبه كمان
نحن من يتم القبض علينا بعد ماتشات الكوره عشان وحشين وبنعمل شغب
وماحدش اتكلم ولا قبض علي المسئول عن دخول جماهير المصري مثلا مع الاهلي
نحن فقط الخائنون لهذا البلد لاننا لم نشجع الهارب
نحن فقط اللي مشربناش من نيلها
ولا هانشرب
عشان احنا مانستهلش الميه دي


منقول

مصر هى ام الدنيا فعلا

مصر كمان مش كرة ورياضة بس


وحتى لو لقينا حاجات كتير غلط فيها مش معنى كده انها وحشة


ولو الكرة تاعبة الناس جدا كده بلاش منها.... بصراحة اسم الموضوع شدنى بس لما دخلت انا اللى اتحرق دمى وخصوصا ان ف تقليل لمصر