محمد سمير هجام و محمد بربر .. وجها لوجه

ارجع بالذاكره شويه يا كئيب و أنت طفل عندك ما بين خمس سنين و13 سنيه رجعت أوعى تخبط الى وراك

كنت بتقرا مجلات وقصص ايه؟

كنت قارىء متميز والله
فلاش .. سماش ... رجل المستحيل ... ميكى ... علاء الدين .. ماوراء الطبيعة .. كوكتيل .. فاكر انى قريت بالصدفة اشهر روايات ادجار ألان بو ( صورة دوريان جراى )
وكنت بقرأ جرايد يومية اكتر من دلوقتى
وكان فى قصص اطفال بتتباع فى المكتبة افتكر انها كانت بخمسة وتلاتين قرش كان عندى منها عشرات الاعداد

كنت بتلعب فى الشارع ؟وبتلعب ايه؟
كوووورة وكنت لاعيب كبير - ولازلت - بالمناسبة انا لاعب فى فريق الكلية بس سبته لاسباب ودواعى مفيش مجال لسردها دلوقتى ... كانوا بيطلقوا عليا ريفالدو وكابتن منتخب مصر للشباب حاليا - معاذ الحناوى - كان بيلعب معايا كتف بكتف ولما ابوه وداه الاهلى قلت لبابا ويدينى مع معاذ قالى بلاش بوظان
هو دلوقتى هيلعب فى كاس العالم للشباب الجاى فى مصر وانا قاعد العب ع الكيبورد فى منتدى شباب بجد

كنت بتعرف تسوق عجله ؟
افتكر ان خالى جابلى عجلة وانا فى رابعة ابتدائى او تالتة وكانت بسنادات
كنت بمشى مترين واتفقلس وهكذا وياما اتشحورت بس انا حاليا محترف سواقة عجل

كنت بتاخد مصروف فى حدود كام؟
افتكر انى كنت بخد خمسة جنيه فى الاسبوع وانا فى خامسة ابتدائى واياميها البريزة كانت بتجيب كيس كراتيه والربع جنيه يجيب اكبر بسكوتة

كنت شاطر فى المدرسه ولا فاشل ؟
كنت قائد فريق الاذاعة وكل يوم كانوا فى البيت عندنا بيقوموا على صوتى وانا ماسك الميك بقدم الاذاعة - المدرسة على بعد بتاع عشرة متر من البيت - ... كل ده فى ابتدائى وكنت كمان قائد فريق اوائل الطلبة فى خامسة ابتدائى وعضو فريق الوعى القومى وحاجات كبيرة اوى
فى اعدادى اطفيت لانى اتخضيت لما شفت مساحة الاعدادية القديمة وكمان كنت فى فصل الاوائل وكانوا بأمانة اشطر منى بمراحل بس كنت بضمن مكان ثابت فى العشرة الاوائل وده انجاز كبير وقتها فى الفصل اللى كنت فيه- تقدرى تتأكدى من عمر - ... وفى ثانوى مكنتش فاضى غير للعب الكورة فى الاستاد والفيفا فى سايبر تاتش وعلى فكرة -عمرى ما كلمت بنات فى ثانوى واول اتصال بالجنس الناعم كان فى الكلية -

كنت بتعمل ايه فى يومك؟
فى فترة الطفولة كنت بنام تسعة وخمسة بعد حديث الروح بعد مسلسل تمنية ع القناة الاولى عشان اقوم للمدرسة بدرى وكنت بجى من المدرسة اعمل الواجب واقعد اضيع وقتى فى اى حاجة - اخصائى تضيع وقت - وهكذا دواليك


ايه أكتر مكان كنت بتحب تروحه؟
بورسعيييييييد اف كورس

كنت بتتابع مسلسلات ايه؟ وكارتون ايه؟

افتكر اوى مسلسل الوتد ... اوان الورد ... نصف ربيع الاخر ... العائلة والناس
ايه أكتر مقلب عملته فى ولدك ووالدتك كل ما تفتكره تضحك ؟
ونا صغير ودونى للدكتور وانا كنت جبان جدا فعشان انتقم منهم خدت سلسلة المفاتيح بتاعت بابا وتقريبا رميتها فى البلاعة

ايه اكتر موقف عملته فيهم كان هيجرلى ليهم حاجه من الخضه؟
تقريبا امى كانت بتضربنى جامد جدا ... عملت نفسى انى مت وفقدت النطق

امتى اخر مرة انضربت ؟ وليه ؟
مش من زمان اوى تقريبا من سنتين .. كنا فى نهار رمضان صايمين بابا قالى انزل هات حجارة للريموت قلتله مش نازل .. كانت علقة جبارة .. وكنت هسيب البيت وامشى بس ولاد الحلال قفلوا الباب بالمفتاح وخبوه منى

كنت فى مدرسه ايه؟
ابتدائى .. عمرو بن العاص المشتركة - كانت تجريبية -
اعدادى ... الاعدادية القديمة
ثانوى .. العكسرية

كنت بتطلع رحلات مع المدرسه ولا لاء؟
لا

كنت مشترك فى فريق المدرسه بتاع الاغانى والحفلات ؟
فى ابتدائى كنت انا اللى ماسكه بس مكنتش بغنى اياميها البنات بس اللى كانت بتغنى - مش عارف ليه -

مسكت قبل كده أمين الفصل أو المدرسه ولا الكليه كانت أول تجربه ليك ؟
ابتدائى فى سنة خامسة كنت امين الفصل
فى تانية ثانوى كنت امين الفصل وكنت بخد الغياب صح وفى اول شهرين العيال كلها جالها جوابات فصل وكانوا ناويين يضربونى - لكن مهما يحاولوا يطفوا الشمس طبعا -

أنا عارفه أنى طولت بس مش مشكله
اسئلتك جميلة بس بتخرج اسرار شخصية كتير