[center]طبق اليوم
القطايف بالسبانخ والسوداني والزبادي والبرسيم
وده صنف مدهش للتحلية
يتّاكل بعد التقلية
بنفس طشّة الملوخية
الطريقة
قال يعني هاتفرق
!!!!!!!!!!!!!!!!!!!!
هاتي القطايق بلليها
والسبانخ أعصريها
والسوداني والزبادي والبرسيم
لازم يكونوا من ساعتين
كلهم سوا منقوعين
مع خلطة المحشي المتينة
معكوك فيها مانجاية وتينة
كل الكلام ده يندهس سوا
يبقى عجينة
قطّعي عليها
القطايف بالسكينة
وكوّريها كعابير كعابير
زي الطعمية
وف طاسة الزيت المغلية
طشّيها
والسعيها شوية
أو احرقيها
تطلع حجر غامق ملهلب
على طول تزوقيه بالكريمة
وتقدمي معاه
عصير رمان بالبرتقان
منقوع فيه الخروب العيدان
وكام حباية حبهان
مهروسة فـ خل ولبن
بعود ريحان
وبس خلاص
طفّي النور
أصله كده كده هايطفّي
...............................
طلع النهار
أو ما طلعش
مش فارقة
ما هي الشمس فـ قلب العتمة غارقة
وعفاريت الضلمة هاجمة، خانقة وسارقة
فرحتنا بطلوع نهار
أي نهار
........
واحلم ... واشتاق
واندم بفراق
واحلم ... واشتاق
واندم بفراق
واحلم ... واشتاق
واندم بفراق
واحلم؟؟
واحلم...
...........
المزاد
ألا أونا
ألا دوي
ألا تريو
آخر الكلام
رخص الكلام
واسألك
بتبيع نفسك بكام؟
أصل اليومين دول
كله في النازل
حتى بكرة، وكل فكرة
والأحلام
عيني ع المزاد
كل اللي كان غالي في يوم
أهه هناك، عندك في الركام
...................
صباح الخير
يعني ايه خير؟
وصباح بيقولوا مش لاقية فلوس تتعالج
نهارك سعيد
نهارك مبارك
وسعيد في المعتقل
السلام عليكم
السلام سلام وداع
وعليكم ألف رحمة ونور
صباح النور
النور مقطوع
وصباح بيقولوا مش لاقية فلوس تتعالج
يوووه، ياباي
أيوه كده، باي باي
.......................
ورق
شهادة ميلاد..
بكالوريوس..
قسيمة جواز..
فيزا فـ باسبور،
وتأشيرة خروج..
وخلاص..
إيوة، إعلام وراثة
وان كان في إعلام الوراثة
اسم وليد،
يبقى نفس الورق من جديد
..............................
مسكت القلم
حاسس أو بيتهيألي
اني عندي زكام
إييه، قصدي كلام
بيقولوا بعض الكلام
علاج للاكتئاب
وسبب الاكتئاب ساعات
بعض الكلام
المهم
نهايته
كنت باقول
حاسس أو بيتهيألي
إني عندي كلام
اسمعوه والسلام
اكتشفت ان
بكرة دايما أحلى
من بكرة
يوم ما بكرة يبقى النهارده
خلص الكلام
أصلي عندي زكام
حد فاهم أو بيتهيّأله
انه فاهم حاجة؟
لو حد حاسس بالأعراض دي
يبقى أكيد مش مركّز في الكلام
أي كلام
.........
سلام
أنا
تخاريفى بمجلة نحلم الالكترونية فى 26/12/2007
الإثنين 23 فبراير 2009 - 16:23
